El Gobiernu da’l primer pasu pa una ampliación de capital de la ZALIA que busca garantizar el so futuru

|
Adrián Barbón Conseyu de Gobiernu telemáticu ZALIA

Esti martes celebróse un Conseyu de Gobiernu estraordinariu pa tratar una única cuestión: l’aprobación del proyeutu de llei pol que s’autoriza una ampliación de capital de la Zona d’Actividaes Loxístiques y Industriales d’Asturies (ZALIA). La so deuda va convertise n’aiciones pa dar solvencia a la entidá pública y permitir la entrada de Sepides.

El Gobiernu cuenta anguaño con un 40 por cientu del capital, pol 30 de l’Autoridá Portuaria de Xixón, el 15 de l’Autoridá Portuaria d’Avilés, el 10 del Conceyu de Xixón y el 5 del Conceyu d’Avilés. Una vegada aprobáu'l proyeutu normativu en Conseyu de Gobiernu va llevase a la Xunta Xeneral pal so alderique y votación en llectura única pa facer efeutiva l’ampliación.

Cumplíu esti pasu, l’Executivu pasaría a controlar más del 80 por cientu de la ZALIA al convertir n’aiciones los cuasi 80 millones que-y debe la entidá polos préstamos concedíos nesti tiempu. Esto facilitará que la sociedá pública estatal Sepides materialice’l compromisu alquiríu con Asturies pa collaborar na finalización de les obres d’urbanización y de construcción d’una subestación llétrica, agora pendientes, y entamar cola comercialización de les parceles.

La ZALIA, proyeutu qu’arrancó, non ensin polémica y protestes vecinales, nel 2005, ensin actividá hasta la fecha, considérase dende’l Gobiernu de máxima relevancia pal desarrollu de la loxística y los puertos del Estáu n’Asturies y pa posicionar al país como un referente loxísticu nel Arcu Atlánticu.

Na imaxe, Barbón nel Conseyu de Gobiernu estraordinariu d'esta mañana, que se celebró de manera telemática. Semeya obra d'Armando Álvarez.

Contador Estadistiques