El Gobiernu crea una subvención pa la realización de festivales

Pueden participar iniciatives nos ámbitos de la música, les artes escéniques, el cine y televisión, les artes visuales, la lliteratura o otres temátiques culturales.

El Gobiernu convocó per primer vez una llinia d’ayudes pa profesionales, empreses, entidaes ensin ánimu d'arriquecimientu y entidaes llocales col oxetivu de financiar la realización de festivales p'apostar "pol texíu cultural asturianu y el desenvolvimientu d’una ufierta cultural de calidá, amás d’impulsar el crecimientu económicu de la industria cultural", apunten dende la Conseyería de Cultura, Política Llingüística y Deporte. Los candidatos han presentar proyeutos yá fechos y nos que les actividaes oxetu de financiación tean acabaes primero del 31 d’ochobre del 2024.

La subvención, que se convoca en réximen de concurrencia competitiva, divídense en cinco llinies d'ayuda en función del presupuestu del eventu. Son les siguientes:

• Entidaes ensin ánimu d'arriquiecimientu pa grandes festivales: 50.000 euros.

• Profesionales y empreses pa grandes festivales: 50.000 euros.

• Entidaes llocales pa cualquier tipu de festival: 75.000 euros.

• Entidaes ensin ánimu d'arriquecimientu pa festivales: 100.000 euros.

• Profesionales y empreses pa festivales: 25.000 euros.

La cuantía máxima de les ayudes otorgaes va ser de 25.000 euros per proyeutu.