El Gobiernu considera un techu presupuestariu de 4.069 millones

Ramón del Riego, conseyeru de Facienda y Sector Públicu, indicó esti xueves que’l Gobiernu prevé un techu presupuestariu de 4.069.244.252 euros. Ye posible que s’espere a xineru o febreru pa tener el presupuestu definitivu.
 
L’escenariu descritu por Del Riego ye’l "más optimista”, según indicó, porque les estimaciones podríen disminuir esa cantidá en función de les informaciones del Gobiernu estatal. El conseyeru dio una rueda de prensa tres el Conseyu de Gobiernu na que tuvo acompañáu pol conseyeru de Presidencia, Florentino Alonso Piñón, na que confirmó que l’Executivu yá trabaya na ellaboración d’un presupuestu nuevu, como adelantó ayeri José Manuel Rivero, conseyeru d’Economía y Emplegu.
 
La cifra d’ingresos estimada sal, según pallabres del conseyeru de Facienda, de la suma de 2.494 millones d’aportaciones del sistema de financiación autonómicu, 1.087 millones de ingresos del Gobiernu nacional y 488 millones de deuda axustada al plan económicu financieru vixente. Sicasí, recordó que la cifra d’ingresos del sistema de financiación ye una estimación del mes de xunetu, polo que podría menguar. "Trátase de simples previsiones dada la falta de programación y d’actividad presupuestaria de l’Alministración del Estáu de la que depende, como se sabe, el 70 por cientu de los nuesos ingresos", comentó. D’esta forma, el procesu d’ellaboración del proyeutu de Presupuestos Xenerales d’Asturies pal 2012 tendrá que contemplar les modificaciones que sían precises conforme se tenga información del Ministeriu de Facienda sobre los Presupuestos Xenerales del Estáu pal 2012.
 
Del Riego señaló que’l Gobiernu siempre manifestó que prefier tener los sos presupuestos propios y dixo qu’hai tiempu, polo que nun ve problema n’esperar a xineru o febreru pa tener un bon presupuestu p’Asturies, adaptáu a la realidá económica.
 
Na semeya, Ramón del Riego y Florentino Alonso.