El Gobiernu británicu va recortar 490.000 empleos públicos

El ministru británicu d'Economía, George Osborne, detalló na Cámara de los Comunes el programa de recorte del gastu públicu, qu'inclúi un recorte de 490.000 puestos de trabayu nel sector públicu nos próximos cuatro años.

El ministru británicu d'Economía, George Osborne, detalló na Cámara de los Comunes el programa de recorte del gastu públicu, qu'inclúi un recorte de 490.000 puestos de trabayu nel sector públicu nos próximos cuatro años.

Ente otros recorte, l'Executivu británicu tien previsto aumentar la edá de xubilación estatal hasta los 66 años nel 2020, algo que, según Osborne, tán faciendo nesti momentu munchos países y que va permitir l'aforru antes d'últimos de la próxima llexislatura de 5.000 millones de llibres (5.689 millones d'euros) al añu.
  
Coles mesmes, Osborne anunció un recorte adicional nes prestaciones sociales de 7.000 millones de llibres (7.964 millones d'euros), que se sumen a los 11.000 millones de llibres (12.515 millones d'euros) que yá s'especificaron el pasáu mes de xunu.
  
Esti aumentu nel recorte de les prestaciones sociales, va permitir que la reducción del gastu nos distintos departamentos del Gobiernu británicu seya a lo último del 19%, en cuenta del 25% previstu de primeres.
 
Mientres la so comparecencia na Cámara, el ministru, que recordó que'l país ta pagando 43.000 millones de llibres (48.920 millones d'euros) al añu n'intereses de deuda, aseguró que ye inevitable facer frente al déficit presupuestariu del país. "Güei ye'l día nel que Gran Bretaña da un pasu atrás del abismu", sorrayó.