El gobiernu bolivianu da-y trés díes al BBVA pa qu'entregue les sos participaciones n'empreses petroleres

Por mediu del so vicepresidente, Álvaro García Linera, el gobiernu bolivianu anunció que-y da un plazu de trés díes a los bancos BBVA y Zurich pa qu'entreguen de baldre al Estáu les acciones petroleres que xestionen mediante un fondu de pensiones nes empreses nacionalizaes. Ambes entidaes bancaries alministren conxuntamente dende l'añu 1997 un fondu colectivu de pensiones creáu a partir de la privatización de les empreses estatales de los sectores enerxéticos.

García Linera, presidente n'exerciciu pola ausencia d'Evo Morales, firmó un decretu complementariu al suscritu fai una selmana p'asumir "el control absolutu" del Estáu sobre'l negociu petroleru. Según indicó "habrá intervención a estos fondos de pensiones si nun cumplen en trés díes el decretu, asina de claro".

Per otru llau'l propiu Evo Morales intervino ayer na Comisión d'Asuntos Esteriores del Parlamentu Européu, onde dixo que cola nacionalización de los hidrocarburos "nun s'espulsa, nin s'espropia a naide", y que les compañíes qu'invirtieron nel país tienen "derechu a recuperar la so inversión y los beneficios, pero non al control de los recursos naturales del país". Como respuesta a una pregunta del eurodiputáu del PP José Ignacio Salafranca, Morales esplicó qu'esos fondos qu'hasta la fecha yeren alministraos por empreses privaes, agora van selo poles empreses del Estáu, polo que "nun s'afecta, nun se quita a naide, nun s'espropia a naide".