El Gobiernu aumenta en 15.000 euros les ayudes individuales pa emigrantes y descendientes con necesidaes

La convocatoria d’esti añu d’ayudes individuales pa emigrantes y descendientes destina 410.000 euros, 15.000 euros más que l’anterior. El Gobiernu aporta esta cantidá a asturianos residentes n’América Llatina y socesores en primer grau de consanguineidá con necesidaes económiques, enfermedaes graves o víctimes de violencia de xéneru.

Les persones que pueden optar a estes ayudes, un máximu de 2.000 euros por persona cola esceición de Cuba, que llegaría hasta los 600 euros, han acreitar que nun tienen les rentes o ingresos necesarios pa cubrir les sos necesidaes básiques de subsistencia d’alcuerdu a la realidá socioeconómica del so país de residencia. Pa echar un gabitu a estes persones la Conseyería de Presidencia convoca dos llinies: pa persones de 65 años o más, y de 18 a 64 años que sían víctimes de violencia de xéneru o carezan invalidez permanente o enfermedá grave incapacitante pal desendolcu de la vida llaboral.

Pal repartu de los 410.000 euros, cantidá que supera en 15.000 los 395.000 de la convocatoria anterior, afítase un tope máximu por país, que van dende los 150.000 euros p’Arxentina o 130.000 de Cuba a los 2.000 que sumen un conxuntu d’estaos onde la presencia de la emigración asturiana ye mui baxa. En comparanza col añu pasáu, rescampla l’aumentu de la cifra destinada a Cuba, más del doble, yá que se presupuestaren 63.000 euros.

El plazu de solicitú de les ayudes son 30 díes hábiles dende mañana, esto ye, hasta’l 25 de xunetu.

Na semeya, la conseyera Rita Camblor recibe a emigrantes participantes nel Programa 'Añoranza' del 2019.