El Gobiernu asturianu va investigar les desapaiciones d’asturianos na dictadura arxentina

El director de Cooperación del Gobiernu asturianu Rafael Palacios dio esta mañana una rueda de prensa pa dar a conocer el resultáu del so viaxe a l'Arxentina, onde foi tres d'información sobre les families de dos desapaecíes asturianes baxo la dictadura militar que gobernó aquel país ente 1976 y 1983.

Rafael Palacios, qu'aconceyó nel país americanu con dirixentes políticos y organizaciones de derechos humanos, declaró que se tien conocimientu de la desapaición de polo menos media docena d'asturianos y descendientes d'asturianos naquellos años, pero adelantó que puen ser "bien d'ellos más" polo que dio anuncia de que va entamase dende'l Gobiernu asturianu una campaña pa dar coles sos identidaes, pa lo que dende la so estaya de gobiernu cuenten con unviar personal especializao a Arxentina pa consultar toles fontes y archivos disponibles y roblar un protocolu d'actuación coles estayes del gobiernu arxentinu encargaes del tema, concretamente cola "Unidá d'Investigación de Desapaecíos".

Palacios apuntó que, anque hasta va poco munchos familiares de represaliaos pola dictadura nun s'atrevíen a falar nin reclamar por mieu, el desaniciu nel 2003 de les lleis de "obediencia debida" y "puntu final" que-yos quitaben responsabilidá a los militares arxentinos poles desapaiciones y tortures tan faciendo que se xorrasque más nesti puntu escuru de la historia arxentina. Nesti sentíu'l director de cooperación alvirtió que "la realidá pue ser dura" y qu'anque'l númberu oficial de desapaecíos españoles n'Arxentina ye de 49 "ye fácil que la cifra real s'allegue a los 300".

Los dos casos que motivaron el viaxe de Palacios foron el de Rocío Angela Martínez Borbolla, natural de Xixón y desapaecida a los 31 años en Bonos Aires en xunu del 1976 y el d'Antonia Margarita Fernández, desapaecida en Mar de Plata nel 1978 con 33 años xunta'l maríu y les sos dos fíes de 3 y 7 años, anque los güelos pudieron dempués recuperar a les neñes. Nel viaxe a Arxentina Palacios conoció de primer mano'l casu de Ceferino Fernández, nacíu en Tinéu nel1943 y desapaecíu en setiembre del 1975 dientro de les acciones de la "Triple A" entovía con Isabel Perón al frente del Gobiernu anterior a la dictadura militar y el d'una "madre de Mayu" asturiana que tien dos fíos desapaecíos. Otru de los posibles casos ye'l de Cecilia Viñas, nieta d'asturianos y desapaecida en xunu del 1977.