El gobiernu asturianu va invertir 3,7 millones d’Euros en Parque de Redes

La Conseyería de Mediu Ambiente, Ordenación del Territoriu y Infraestructures presentó esta selmana un plan integral d'actuación que va afectar al Parque Natural de Redes, nel altu Nalón.

La iniciativa del Gobiernu denomínase "Redes, Parque de la Fauna" y faise col oxetivu de que los visitantes puedan observar la fauna del parque de manera que la seguranza y tranquilidá de los animales queden aseguraes y qu'amás los mesmos visitantes puedan participar n'actividaes empobinaes a la conservación del espaciu

Con una dotación presupuestaria de 3,7 millones d'euros aprebada en Conseyu de Gobiernu d'esti xueves, les primeres actuaciones que contempla'l programa van entamase yá pa últimos d'esti añu. Ente elles rescampla la creación d'un centru de recuperación de la fauna onde se-yos dea tratu a los animales que lleguen mancaos y que seya tamién un centru preparáu pa una rempuesta rápida en casu de grandes daños a la fauna por marea prieto o envelenamientos. Otra de les actuaciones del plan consiste n'apertura d'una rede d'observatorios de fauna que van permitir ver a los animales, llevando a los visitantes al hábitat de los animales o acutando espacios que tengan condiciones asemeyaes a les que teníen los animales en llibertá, desplazándose en tou momentu los visitantes per una rede de caminos y corredores que nun van tar a la vista de los animales. Otres actuaciones complementaries pasen pela apertura d'un criaderu de faisán o gallu montés, un aviariu, reptilariu, anfibiariu y un acuariu natural.