El Gobiernu asturianu refuga un permisu pa operase a un de los sos lletraos por tar n'asturianu

El xurista Xurde Blanco Puente, lletráu titular del serviciu xurídicu del Principáu d'Asturies y miembru del colectivu "Xuristes pol Asturianu" convertióse nel protagonista d'una nueva polémica rellacionada cola llingua al negase la Conseyería de Presidencia a tramitá-y les solicitúes de permisu precises pa poder sometese a una operación nel Hospital xeneral d'Asturies. El lletráu, que sufrió nestos últimos años dos infartos y un procesu d'ansiedá polos que estuvo dellos meses de baxa, va pasar güei pel quirófanu ensin contar col permisu obligatoriu.

El xefe del serviciu xurídicu de la Conseyería de la Presidencia retrucó a Blanco que nun se podía dar cursu llegal a la so petición, encontándose pa ello nel artículu 4.2 de la llei d'usu y promoción del asturianu, qu'asegura que, anque fala de "les comunicaciones orales o escrites de los ciudadanos" nun fai espresa a los asuntos que, en rellación col serviciu, planteen los funcionarios d'esta Alministración na so condición de tales", polo que s'alvierte que nun se-y va a tramitar la solicitú al empar que s'encamienta al xurista que s'abstenga de presentar más escritos énte'l xefe de serviciu en cuantes que, dende esi momentu en p'alantre "tou escritu que se presente en llingua non oficial va archivase ensin más trámites".