El Gobiernu asturianu quíta-y razón a Ovidio Sánchez nel tema del llobu

La Conseyería de Mediu Ambiente asoleyóayeri un comunicáu de prensa nel qu'acusa d'indocumentáu al líder del PP Ovidio Sánchez por asegurar que'l llobu mató más de 10.000 cabeces de ganáu.

Tres de la reunión que tuvieron el líder del PP n'Asturies y ganaderos del Cuera pa falar sobre la situación del llobu na cordaldel oriente d'Asturies y na que dambes partes afirmaron que'l llobu matare a más de 10.000 cabeces de ganáu de va cinco años p'acá, la rempuesta del gobiernu asturianu nun tardó muncho en dase.

Según un comunicáu oficial de la Conseyería de Mediu Ambiente, la indocumentación de la que fexo gala Ovidio Sánchez y la falta de xacíu de les sos afirmaciones nun concueyen col altor que se-y supón a un representante políticu. Ovidio, que llegó a afirmar que llegaría'l momentu en que'l llobu empezare a atacar a les persones, dixo que la situaciónque se vive nel Cuera col llobu ye productu de la mala xestión del gobiernu, una acusación contra la que Mediu Ambiente diz que dende que s'entamó col plan de xestión de la especie, que foi pioneru nel estáu, faense censos tolos años, amás de campañes de control del númberu de llobos. Mediu Ambiente diz que los datos de cada campaña son públicos y que se sabe a cuanto ascienden los daños pol llobu al ganáu con datos que se faen públicos al traviés de SADEI y que s'esponen en foros como la Federación Asturiana de Conceyos, onde tien representación el PP.

En concreto, Mediu Ambiente diz que contra los datos falsos que dio por bonos el llunes Ovidio Sánchez, el descensu de cabeces de ganáu nel Cuera ye del 0,12% nel últimu añu, tantu por cientu que ye del 4% nos picos d'Europa, ello sobre unes cifres totales de 24.572 cabeces en Cuera y 30.175 nos Picos d'Europa.