El Gobiernu asturianu prohibe pescar a la flota gallega nes agües interiores asturianes

La Conseyería de Mediu Ambiente y Desarrollu Rural denegó a
armadores gallegos les autorizaciones solicitaes pa faenar col arte de cercu
n'agües interiores asturianes tres consultar colos interesaos, n'especial
cola so flota pesquera, y corroborar que dichos permisos puen "afectar
negativamente", al poner "en peligru" la preservación
d'unos recursos escasos, como son les especies peláxiques, según
informaron fontes del gobiernu al traviés d'una nota de prensa.

Con estes resoluciones, l'oxetivu de la Conseyería de Mediu Ambiente
y Desarrollu Rural ye "algamar un equilibriu na ordenación de la
flota pesquera, axustando los recursos existentes a les dimensiones de la flota
dedicada a esta pesquería". Asimesmo'l presidente de la
Federación de Cofradíes d'Asturies, Dimas García,
xustificó la decisión del Gobiernu asturianu de non autorizar la
pesca n'agües interiores d'embarcaciones gallegues ante la escasez
d'especies. Pa García, les "cofradíes tienen de protexer los
sos caladeros al igual que faen el restu de comunidaes autónomes" y
recordó que "les embarcaciones gallegues interesaes en faenar
n'Asturies usen apareyos mui dañinos pa los caladeros".