El Gobiernu asturianu presentó'l plan de xestión del llobu

El segundu plan añal de xestión del llobu prevé da-yos muerte a 24 lobos a lo llargo d'esti exerciciu y perita'l poblamientu d'esti animal n'Asturies alredor de los 300 exemplares.

La Conseyería de Mediu Ambiente dio a conocer ayeri los pormenores del II plan añal de Xestión del Llobu. Según los datos del censu que remana'l Gobiernu, n'Asturies hai 36 camaes de llobos contra les 30 qu'había l'añu pasáu. Ello da, a una media d'unos 8/9 exemplares per camada, un total de cerca de 300 exemplares. La Conseyería reconoz que, anque xubió la población, nun se rexistraron proporcionalmente más daños por ataques d'esta especie al ganáu, una circunstancia que se xustifica pola mayor seriedá de los censos actuales que faen qu'apaezan más llobos que posiblemente nun tuvieren censaos primero. En cuantes a los daños causaos pola especie, la viceconseyera Belén Fernández reconoció qu'estos vienen menguando dende l'añu 2003 y que na campaña 2004 namás 835 ganaderos -el 4% de los ganaderos de zones con presencia del llobu- presentaron quexa por ataques al so ganáu.


Sicasí, y anque'l númberu de daños vien menguando, la Conseyería diz que van matase nesti exerciciu 2005-2006 un total de 24 llobos, incluyendo tolos que tan na fastera del Cuera, llugar onde se rexistren de contino les protestes de los ganaderos contra la presencia del llobu. El Principáu diz que quier torgar que los ganaderos sufran daños al empar que quier desaniciar la caza furtiva, pa lo que se dio anuncia de la creación d'un plan de control de la fauna silvestre. Según los datos de la Conseyería, l'añu pasáu morrieron 47 exemplares de llobu, el 42'5% d'ellos, de manera illegal.