El Gobiernu asturianu pon fecha pa echar a andar la RTVA

La Xunta Xeneral del Principáu foi l'escenariu esta selmana de la primer batalla política pola televisión autonómica. La primer tanda de munición gastola'l xueves el PP al echar p'atrás cola abstención de los sos parllamentarios la propuesta conxunta d'IX y PSOE pa poner un primer conseyu d'alministración pal énte públicu de comunicación. El PP actuaba cumpliendo col guión y al abstenese, negába-y a la propuesta los dos tercios de sofitu de la cámara que se precisen pola propia llei de la TV pa poder sacar alantre la canal.

En rempuesta, el PSOE, cumpliendo tamién colo que se contaba, presentó ayeri vienres en Conseyu de Gobiernu una propuesta enxerta na Llei d'Acompañamientu de los Presupuestos Xenerales d'Asturies pa cambiar el mandatu de la mayoría de los dos tercios de la cámara. La propuesta del gobiernu apauta un un sistema provisional pa escoyer a los miembros del Conseyu d'Alministración del Ente Públicu en casu de que'l proceder normal nun salga alantre, casu de lo que pasó'l xueves. Ello ye que si pa febreru de 2004, que ye la fecha que se pon de tope, nun hubiere "fumata blanca" na creación del Conseyu d'Alministración, daríase pasu a un conseyu provisional cada grupu parllamentario punxere un candidatos en proporcion al númberu d'escaños que tenga na cámara autonómica. El conseyu resultante aprebaríase na Xunta Xeneral por mayoría absoluta ensin precisar de mayoría de dos tercios de la cámara.

Siguiendo colos pasos d'un baille que yá llevaba tiempu preparáu, la primer batalla pola tv autonómica acabó con debate enraxonáu na Xunta Xeneral del Principáu. Los protagonistes del alderique, que nun escatimó en munición, foron Vicente Álvarez Areces y el diputáu del PP Juan Morales.Morales personifico'l debate y faló de "la TV que usté (por Areces) y el señor Valledor defenden" plantegando la falta d'etica y l'agraviu que suponía pa elli la financiación del nuevu hospital central al traviés de la tasa de la gasolina mientres d'otra parte diba criase un furacu nes finances autonómiques cola creación de la RTVAS. Areces devolvió-y al popular l'acusación de falta d'ética y encontóse na delda histórica del Insalud con Asturies y na falta de xusticia de les polítiques fiscales del gobiernu central pa coles autonomíes nun debate en qu'acabaron meciéndose
tolos aspectos recoyíos na llei d'acompañamientu a los presupuestos.