El Gobiernu asturianu lleva'l Día de la Muyer a Llangréu

La Conseyera de la Presidencia, María José Ramos y la Directora Xeneral del Institutu Asturianu de la Muyer, Begoña Fernández, presentaron esta mañana'l programa d'actos oficiales pa la xornada 8 de marzu, Día Internacional de la Muyer.

Siguiendo cola tradición de llevar los actos oficiales d'esti día cada añu a un conceyu distintu de la xeografía asturiana, Llangréu ye l'escenariu escoyíu nesti 2006 pol IAM pa unos actos que van entamar a les 5 de la tarde cola presentación de la periodista Montserrat Martínez de Radio Llangréu y nos que van participar el Presidente Asturianu, l'Alcaldesa de Llangréu y cuatro muyeres que l'Institutu Asturianu de la Muyer entiende que son "significatives na construcción de la igualdá n'Asturies". Ente estes muyeres rescampla Concepción Rodríguez Valencia, descendiente d'una dinastía de mineros que vio como la empresa estatal HUNOSA-y negaba l'accesu a un puestu de trabayu al que tenía derechu nel añu 1985, entamando una llucha nos tribunales que remató nel añu 1992 con una sentencia del Constitucional que-yos reconoció a les muyeres el derechu a trabayar na mina.

Otra de les muyeres homenaxeaes va ser la poetisa Nené Losada Rico, Medaya de plata d'Asturies y decana de les lletres n'asturianu, mientres que la especialista en recursos humanos Carmen Valdés y la historiadora Mónica González Santana, especializada nel estudiu del papel de la muyer asturiana nes dómines prerromana y romana completen el grupu de muyeres representatives escoyíes pol IAM nun actu que va echar el piesllu coles actuaciones musicales del grupu de pop femeninu Nosoträsh y la cantante Tina Gutiérrez.

Adelantándose a los actos oficiales, el colectivu xuvenil nacionalista Darréu tien preparada pa esti sábadu una xornada reivindicativa en Candás (Carreño) que va entamar a les 12:30 hores baxo'l lema "Col machismu denguna tolerancia". L'actu va consistir en pintar un mural de más de 10 metros nel paséu marítimu de la villa y na llectura d'un manifiestu.