El Gobiernu asturianu lleva a Xixón l'actu central del Día de la Muyer

Con motivu de la celebración institucional del Día Internacional de la Muyer Trabayadora, el Gobiernu asturianu entama actos oficiales en Xixón que van tener llugar nel teatru Xovellanos dende les 18:30 de la tarde baxo'l lema "De los derechos a los fechos" siguiendo la iniciativa del Parlamentu Européu que proclamó l'añu 2007 "Añu européu de la igualdá". Nel actu van intervenir el presidente asturianu Vicente Alvarez Areces, l'alcaldesa de Xixón Paz fernández Felgueroso; la conseyera de la Presidencia, María José Ramos y la miembru del Conseyu d'Estáu, feminista y caderalga de Filosofía Moral de la UNED, Amelia Valcarcel.

Pela so parte, la Coordinadora Feminista convoca una concentración a les 20,00 hores énte'l Teatru Campoamor d'Uviéu baxo'l lema "Güei por nosotres, mañana tamién".

Amás de los actos centrales d'esti día, bien de conceyos asturianos dediquen a lo llargo d'estes selmanes actos especiales dedicaos a analizar el papel y la situación de la muyer na sociedá actual y a facer talleres de concienciación sobre temes de xéneru. Ye'l casu de Cangas del Narcea, qu'al traviés de la so conceyalía de la muyer organiza'l ciclu "La representación de la muyer na sociedá al traviés de la cultura" o'l de L.lena, que, al traviés del módulu d'Axentes d'Igualdá organiza tamién una serie de conferencies y proyecciones. En Mieres, per otra parte, la ONG Médicos del Mundu presentó ayeri un estudiu sobre ún tema que garra actualidá nos estudios de xéneru como ye la realidá de la prostitución.

Con motivu d'esti día de la muyer, los sindicatos UXT y CC OO emitieron una nota de prensa conxunta na que les dos organizaciones enfótense en que la "Llei d'Igualdá" que promueve'l Gobiernu central "xenere'l cambéu social" que se pretende y na que llamenten que la Llei Integral de Midíes contra la Violencia de Xéneru nun diera'l resultáu que se contaba. Los dos sindicatos afirmen qu'entovía existe "la discriminación llaboral por razón de sexu" y denunciaron "l'aumentu de las diferencies salariales ente muyeres y homes, así como "l'acosu sexual y moral contra les muyeres" que detecten n'Asturies.