El Gobiernu asturianu fai una entruga ambigua al Conseyu Consultivu sobre l’asturianu na reforma estatutaria

El Conseyu de gobiernu del Principáu d'Asturies unvió formalmente ayeri al Conseyu Consultivu d'Asturies, máximu órganu de consulta del executivu, el dictame sobre la reforma del Estatutu d'Autonomía d'Asturies, un documentu en que'l Gobiernu plantega un total de 30 entrugues qu'afecten a otros tantos puntos del articuláu de la Llei Orgánica pola que se manda l'autonomía asturiana dende 1981.

Anque munches de les entrugues que se planteguen al Conseyu Consultivu falen de posibles escenarios futuros de cambéu o de reformes concretes que quieren facese sobre l'articuláu del estatutu con una clara voluntá d'afondar na so redacción actual, sobre la cuestión de la llingua asturiana'l testu nun avanza o da a entender voluntá d'alteriar l'estatus actual del asturianu dientro del testu del estatutu, anque de cualquier manera sí que se-y encarga al Conseyu Consultivu que faiga un "Análisis del alcance xurídicu de la regulación estatutaria del bable o asturianu y de los sos desarrollos normativos, lo mesmo que del grau de protección normativa que se-yos da a les modalidaes llingüístiques propies de la zona occidental asturiana" una redacción lo bastante abierta pa que nella puea entrar dende un analisis qu'incluya la redacción actual del estatutu y la so hipotética suficiencia o insuficiencia hasta una posible rellación del asturianu con otros estatutos na materia llinguística, anque en cualquier casu'l testu evita crear espectatives al eludir dafechu cualquier referencia a la posible modificación del artículu 4 del actual estatutu, que ye nel que se fala de la llingua asturiana, amás de nun facer referencia nenguna a un hipotéticu casu d'oficialidá del asturianu.

Otramiente, la solicitú que se-y unvió al Conseyu Consultivu plantega un total de 30 entrugues de tipu formal y de conteníos de la reforma. Ente les cuestiones que se faen pídese-y al Conseyu Consultivu qu'apaute los posibles escenarios de definición de la comunidá asturiana como rexón, nación o como cualquier otra posibilidá, y que se describan los efectos xurídicos que tendría cada denominación. Otra de les consultes refierse a la definición de les llendes d'Asturies énte la posibilidá de qu'Estatutos de comunidaes qu'atiesten cola nuestra planteguen la posibilidá de facer cambeos nel so territoriu.

El Gobiernu asturianu entruga tamién al Conseyu Consultivu sobre la posibilidá de desaniciar la condición, obligatoria anguaño, de que'l Presidente del Gobiernu asturianu sía tamién diputáu na Xunta Xeneral y les posibilidaes de facer cambeos na elección d'esti cargu na Xunta Xeneral. El decretu tamién entruga poles víes hacia la creación d'una policía autonómica, pidiendo que s'analicen l'ampliación de les funciones de les unidaes policiales anguaño venceyaes al Gobiernu asturianu y poles posibilidaes de disolver anticipadamente la Xunta Xeneral y convocar elecciones autonómiques anticipaes.

El Gobiernu asturianu xustificó'l recurrir al Conseyu Consultivu, que se creo'l pasáu añu 2005 y que preside Bernardo Fernández, por culpa "de lo complicao xurídica y técnicamente de la materia" y espresó tamién la so voluntá de rematar el procesu de reforma enantes de que s'escose la llexislatura actual. El dictame del Conseyu Consultivu tien de facese enantes del 10 d'abril, fecha en que va entamar lo que ye'l debate políticu sobre la reforma estatutaria.