El Gobiernu asturianu convoca los premios “Sociedá de la Información”

El Gobiernu asturianu quier con estos premios afalar y esparder el llabor de persones y entidaes, públiques y particulares, que contribuyan al desarrollu de l'aplicación de les nueves tecnoloxíes

Cinco categoríes van tener estos premios que presentó ayeri'l viceconseyeru de Presupuestos y Alministración Pública Luis Iturrioz: Meyor Web Empresarial, Meyores Servicios Electrónicos d'Interés Públicu, Meyor Iniciativa en Formación y Educación rellacionada cola Sociedá de la Información, Meyor Iniciativa Empresarial TIC 2005 y Meyor Proyectu d'Investigación nel campu de la SI. Anque l'ámbitu de participación lléndase al territoriu asturianu puen presentase candidatures de persones físiques y xurídiques de fuera siempre que puea demostrase que'l so llabor repercuta positivamente n'Asturies

El plazu pa la presentación de candidatures ta abiertu dende güei hasta'l 11 de payares. Esiste de cualquier manera una estaya del concursu, la de "Servicios Electrónicos d'Interés Públicu" que sigue un procesu distintu en cuantes que nella van ser los usuarios los que propongan y escueyan ellos los los meyores servicios "online" de les alministraciones autonómica y local y d'entidaes que faen llabor n'Asturies. El fallu d'estos premios, que carecen de dotación económica en cuantes que suponen un "reconocimientu simbólicu" al dicir del viceconseyeru Iturrioz, va dase a mediaos del mes de payares.
Más información na web de los premios