El Gobiernu asturianu acuta pa elli trés de les cuatro canales de la TV Dixital

El Gobiernu asturianu acutó pa elli trés de les cuatro canales de televisión dixital terrestre (TDT) d'ámbitu autonómicu, y namás va sacar una canal a concursu públicu. De les trés canales de la TDT que l'executivu decidió nun llicenciar, dos van ser pa la TV autonómica (RTPA), la primera pa tresmitir la señal d'emisión actual de l'autonómica y la segunda en previsión d'una futura segunda canal de la RTPA.

La tercera canal de la TDT que nun va salir a concursu va quedar pal desarrollu de servicios de l'alministración qu'actualmente puen facese al traviés d'internet, anque a la espera de sabese como va facese como va facese la comunicación ente los ciudadanos y l'alministración al traviés de la televisión.

El Conseyeru de Facienda Jaime Rabanal esplicó que la única canal de TDT que va pasar a xestionarla iniciativa particular salió a concursu nel BOPA de güei y cuenta con otorgase pal mes d'ochobre. Les condiciones del concursu apauten un plazu d'esplotación de la canal de diez años, prorrogables por otros diez, y cada llicitador que quiera presentase ha tener un mínimu capital social d'un millón d'euros, valorándose la so ufierta de contenidos, la creación d'empleu o la prestación de servicios dixitales amestaos a la ufierta de TV, qu'ha tener un mínimu de cuatro hores diaries orixinales y con conteníos rellacionaos con Asturies.

Al marxe d'estes canales autonómiques, l'alministración asturiana ta esbillando les ufiertes que se presentaron a la televisión dixital terrestre local. Son 54 les ufiertes qu'hai enriba la mesa d'Industria pa optar a les 24 canales dixitales locales particulares que van repartise per toa Asturies. El concursu va decidise en setiembre o n'ochobre a lo más tardar.