El Gobiernu aprueba'l tercer paquete d'ayudes a emigrantes retornaos

Van beneficiase un total de 13 persones en situación precaria procedentes de Venezuela, México, Francia, Reinu Xuníu y Noruega.

La Conseyería de Presidencia y Participación Ciudadana destina 39.500 euros a la execución de trés proyeutos de sofitu y asistencia social a población emigrante. Ente estes iniciatives destaca l'aprobación d'un espediente de subvenciones direutes nueves, que sumen 21.300 euros, pa 13 persones en situación vulnerable retornaes al país.

Éste ye'l tercer paquete d'ayudes a la torna que l'Executivu concede esti añu a emigrantes asturianos o descendientes que s'atopen en situación de precariedá, tanto económica como llaboral y social, y decidieron allugar la so residencia n'Asturies. De los 13, 9 proceden de Venezuela, país que dende l'apertura d'esta llinia d'ayudes tien más beneficiaos, un total de 43, mentes que'l restu retornen de México (2), Brasil (2), República Dominicana (2), Francia (1), Noruega (1) y Reinu Xuníu (1).

Les otres dos iniciatives sobre emigración nacen de la renovación de convenios roblaos cola Asociación de Emigrantes Españoles Retornados (AEERA) y cola entidá Españoles en Brasil Sociedad de Beneficencia y Cultural, a los que se destinen 10.000 y 8.000 euros, de manera respeutiva. El primeru ta empobináu a facilitar les actividaes y servicios qu'esta asociación empresta a los emigrantes que tornen a Asturies en materies tán importantes como l'asesoramientu sobre trámites alministrativos, llexislación y procedimientos sanitarios o fiscales, especialmente los rellacionaos col cobru de pensiones de xubilación y la solicitú de prestaciones asistenciales, mentes que'l segundu garantiza'l caltenimientu d'un proyeutu de sofitu a familiares de persones mayores con discapacidá y en situación de dependencia leve, d'orixe asturianu, y residentes en Brasil, del que se beneficiaron 17 persones nel 2018.