El Gobiernu aprueba'l quintu Parque Natural d'Asturies

El Conseyu de Gobiernu del Principáu d'Asturies aprobó na so sesión d'esti xueves 2 de marzu'l Proyectu de Llei pol que se declara'l Parque Natural de Pinubina y La Mesa. Esti parque natural, que va ser el quintu que tenga Asturies, tres de los de Ponga, Somiedu, Redes y Fontes del Narcea, inxerta dafechu'l conceyu de Teberga y bien de territoriu de los de Quirós y L.lena.


La representatividá de los ecosistemes y la singularidá de la fauna y la flora d'esti territoriu, neto que la unidá xeográfica que presenta, son los motivos que llevaron a la Conseyería de mediu Ambiente a pidir la declaración de Parque Natural pa esti territoriu que, d'otra manera, yá ta inxertu na rede Natura 2000 como zona d'especial protección pa los páxaros. La declaración de Parque Natural plantégase ente los sos oxetivos facer que concasen "los intereses de conservación de la naturaleza col aprovechamientu de los recursos naturales y el desarrollu y meyora de la calidá de vida de los habitantes del parque, calteniendo los usos tradicionales del territoriu" amás del turismu, contemplándose ente los oxetivos del Parque el "esfrute de los sos atractivos" y faciéndose referencia nesti sentíu a "La promoción del conocimientu del Parque por parte de la población foriata".


El gobiernu del Parque va llevalu alantre'l director xunta una comisión rectora con representación de les estremaes alministraciones y tamién va contase cola asistencia d'un órganu consultivu cola participación nelli de grupos que faigan actividaes al favor del parque, vecinos y la Universidá d'Uviéu. Como primeros pasos pa echar a andar el parque, la Comisión Rectora del Parque tien de llevar al Conseyu de Gobiernu nel plazu d'un añu la so propuesta de Plan Rector d'Usu y Xestión y un Plan de Desarrollu Sostenible.