El Gobiernu aprueba destinar once millones d’euros al salariu mozu

El Conseyu de Gobiernu autorizó esti miércoles la financiación de la convocatoria de concesión de subvenciones a los conceyos d'Asturies pa la execución del programa Salariu Mozu. L’importe total previstu asciende a once millones d’euros.
 
Gracies a esti programa, va subvencionase la contratación de persones menores de 30 años na modalidá de contratu en práutiques o contratu pa la formación y l'aprendizaxe. D’esta forma, el Gobiernu pretende ayudar a los 3.000 mozos y moces paraos a qu’atopen trabayu y que, al mesmu tiempu, puedan meyorar la so cualificación; una midida que, según los sindicatos, yá esiste baxo’l nome de formación dual nel alcuerdu de concertación social y que tuvo poca acoyida l’añu pasáu.
 
Otra manera, el Conseyu de Gobiernu tamién aprobó, nel ámbitu de la Conseyería d'Educación y Universidaes, un gastu de 4.526 euros en dos añalidaes –1.200 euros pa 2011 y 3.326 euros pa 2012– pa la execución del serviciu de direición de les obres d'ampliación de dos unidaes y antoxana na Escuela El Campal de Villoria (Centru Rural Agrupáu Altu Nalón), en Llaviana, y como complementu a esta midida, la contratación y el gastu de 1.310 euros en dos añalidaes –300 euros nel 2011 y 1.010 euros nel 2012– correspondiente al serviciu de coordinación de seguridá y salú d'esta obra.
 
Coles mesmes, na reunión autorizóse un gastu de 168.608 euros destináu a la contratación del serviciu de llimpieza del Centru Integráu de Formación Profesional de Comunicación, Imaxe y Soníu de Llangréu, gastu que se reparte en trés añalidaes: 15.328 euros nel 2011, 84.304 euros nel 2012 y 68.976 euros nel 2013. A lo último, el Gobiernu aprobó l'axudicación d'una vivienda vacante de promoción pública de l'Alministración asturiana en Santiso d'Abres en réxime d'alquiler.