El Gobiernu activa’l Plan d’Inundaciones en fase d’emerxencia en situación 0 y evacúa l'Hospital del Oriente en Les Arriondes

La evolución nos niveles de los ríos y les predicciones meteorolóxiques llevaron al Gobiernu a activar na mañada d’esti miércoles el Plan d’Inundaciones del Principáu d’Asturies (PLANIPA) en fase d’emerxencia en situación 0. L’Hospital del Oriente Francisco Grande Covián ta siendo evacuáu dau l’estáu del Seya y del Piloña.

Guillermo Martínez Suárez, conseyeru de Presidencia y Participación Ciudadana, activó nun primer momentu a les 02.55 hores el PLANIPA en fase de pre-emexencia, de vixilancia y siguimientu, qu’a primer hora ascendió a fase d’emerxencia en situación 0. Esto significa que se tán rexistrando inundaciones llocalizaes que se pueden atender colos medios y recuros disponibles na zona.

En total el 112 rexistrara hasta les 10.49 hores al rodiu 80 incidencies, na so mayor parte por inundaciones y cortes de la rede viaria. Pa güei l’Axencia Estatal de Meteoroloxía (Aemet) decreta alerta naranxa na mariña por fenómenos costeros y mariella en toda Asturies, a esceición de la costa occidental, por agua –tamién por aire nel cordal y Picos–.

Mañana la situación ameyorará pa la fastera occidental y central, a esceición de la mariña, calteniéndose l’alerta mariella nel restu’l país por agua. Na mar, baxará a mariella.

A Xixón, Uviéu y Avilés

Por precaución, Martínez Suárez recomendó tamién la evacuación del Hospital del Oriente Francisco Grande Covián, en Les Arriondes, pola xuba del nivel del Seya y del Piloña. Los responsables sanitarios tán planificando la operación, valorando la situación de los pacientes y los medios y recursos necesarios pal so treslláu a los hospitales d’Uviéu, Xixón y Avilés.

El tresporte ferroviariu tamién ta siendo afeutáu pola situación. En Xixón ta cortáu l’accesu al Muro pa evitar situaciones de peligru pol estáu de la mar y l’Uviéu tuvo que treslladar el so entrenamientu al Tensi pola inundación sufrida n’El Requexón, ente otres munches incidencies en tol país.