El Gobiernu aconceya otra vuelta con Air Europa pa evitar el monopoliu d’Iberia na llinia con Madrid

José Manuel Rivero, conseyeru d’Economía, aconceyó por segunda vegada nos siete díes últimos con responsables d’Air Europa. Nesta ocasión tampoco hubo alcuerdu, anque'l representante del Executivu mostróse otra vuelta optimista.
 
Según informó, el Gobiernu ta estudiando la viabilidá económica de la "posible solución" al conflictu d'Air Europa, compañía que’l vienres va ufrir los sos últimos vuelos ente Asturies y Madrid. Tres la xunta caltenida n'Uviéu, el conseyeru apuntó qu’hubo avances na negociación "pa tratar d'algamar un acuerdu satisfactoriu pa les dos partes". Asina, Rivero indicó que pal Executivu ye importante garantizar la competencia na conexón con Madrid pa qu'esistan precios competitivos nos vuelos hacia "el principal destín de los asturianos" y que, pa ello, ta afondándose na materia, tratando de buscar una solución pa que sigan los vuelos.
 
Al nun zarrar nengún alcuerdu na reunión de güei, paez improbable qu’Air Europa mantenga los cuatro vuelos diarios el sábado qu’estableció en xunu del 2010. Dende esa xornada, Iberia tornará a tener el monopoliu de la conexón con Barajas.