El Gobiernu d’Asturies destina 1,2 millones a ayudes pa caltener races de ganáu autóctones

La conseyera María Jesús Álvarez firma los convenios de collaboración con asociaciones de criadores que miren pola meyora xenética y l’aumentu del númberu d’animales.

La responsable de Desarrollu Rural y Recursos Naturales y los presidentes de les asociaciones de criadores de races de ganáu autóctones firmaron ayeri los convenios de collaboración polos que van percibir anguaño un total de 1.235.000 euros n’ayudes pal caltenimientu del llibru xenealóxicu, el desenvolvimientu de los programes de caltenimientu d’estes races y la so promoción.

D’esta cantidá, l’Asociación Española de Criadores de Ganado Vacuno Selecto de Raza Asturiana de los Valles (Aseava) va percibir 479.513 euros, l’Asociación Española de Criadores de Ganado Vacuno Selecto de Raza Asturiana del Monte (ASEAMO) va tener una subvención de 138.448, l’Asociación de Criadores d’Oveya Xalda d’Asturies (ACOXA) va recibir 29.733 y otros 114.973 van ser pa l’Asociación de Criadores de Ponis de Raza Asturcón (ACPRA).

Tamién se firmaron convenios cola Asociación de Criadores de Gochu Asturcelta (ACGA), por un importe de 15.337 euros; l’Asociación de Criadores de Cabra Bermeya (Acriber), por 17.827 euros, y l’Asociación de Criadores de Pita Pinta Asturiana (ACPPA), con 4.169 euros, cola fin de caltener el llibru xenealóxicu de caúna de los trés races y el desenvolvimientu de los sos programes de caltenimientu.

Amás, la conseyera soscribió otru alcuerdu de collaboración cola Cooperativa Asturiana de Control Llecheru (Ascol) pal desenvolvimientu d’un programa de la meyora xenética de la cabaña ganadera asturiana de raza frisona, que va recibir una subvención de 435.000 euros.

Álvarez destacó’l compromisu del Gobiernu d’Asturies col caltenimientu y la meyora xenética de la producción ganadera y valoró el llabor desenvueltu polos profesionales del campu pa ser quién a que nun se pierda “una riqueza xenética patrimonial propia” y llograr, amás, “estándares de calidá bien altos nes producciones”.

“La recuperación y caltenimientu d’estes races ayuden tamién a la necesaria diversificación de les esplotaciones agraries y a crear riqueza y empléu nel mediu rural”, amestó la conseyera.