El Gernika saluda en Twitter al UP Langreo n'asturianu y ésti respuende-y n'eusquera

L'equipu vascu visita Ganzábal na primer xornada de Lliga del grupu 2 de Segunda B.

Gernika y UP Langreo protagonizaron en Twitter un prestosu xestu al comunicase ente ellos en Twitter emplegando la llingua llariega del rival depués de conocese'l sortéu del calendariu. Ésti empareyaba a dambos equipos nel primer partíu, previstu pa la fin del selmana del 26, y el conxuntu vizcaín espublizaba el tweet siguiente.

Empezamos la lliga llueñe de casa, viaxamos hasta Llangréu. Deseyamos esfrutar de la hospitalidá d'Asturies con un pocu de sidra y que gane'l meyor.@UPLangreo - @GernikaClub #forzagerni

— Gernika Club (@GernikaClub) 27 de julio de 2018

Nun tardaría en llegar la respuesta dende Llangréu, ún de los clubes asturianos que más respetu amuesen pa col idioma, utilizando nesta ocasión l'eusquera. Asina, treslladaba al Gernika que sería bienllegáu y unviaba-y un saludu: "Eskerrik asko, ongietorriak izango zarete. Agur bero bat! #TamosXuntosNesto".

Esti intercambiu de mensaxes –que se pue siguir calcando nel tweet– nun pasaría desapercibíu na rede social, con munches persones destacando l'exemplu de respetu de dambos equipos pa les dos llingües qu'ayuda tamién a fomentar les bones rellaiciones ente aficiones.

El Vetusta, en Barakaldo

El Vetusta, equipu que torna a la Segunda División B 16 años depués, y tres tener qu'empezar de cero en Segunda Nacional, va debutar en Lasesarre contra'l Barakaldo. Pela so parte, el Sporting B estrénase en casa recibiendo al Leioa.

Na xornada cabera de la competición, l'Unión va recibir en casa precisamente al Leioa, mentes que'l filial del Uviéu va viaxar a Durango y el roxiblancu va terminar en Mareo col Amorebieta. El Sporting B-Vetusta va llegar pronto, na xornada 3, prevista pa la fin de selmana del 9 de setiembre.