El Garrapiellu fai campaña pol Texu milenariu de La Collá

La tertulia cultural «El Garrapiellu» y el Foru Arte Ciudá inauguren esti vienres 25 a les seyes y media de la tarde en Centru Cultural Caxastur de la Prazuela del Monte de Piedá de Xixón la esposición "el texu d'Asturies" una colectiva na que participen dellos de los más importantes artistes asturianos, con nomes como'l de Hugo O'Donnell, nel oxetivu común de prestixar esti árbol totémicu de la cultura tradicional asturiana.

L'amuesa va tar abierta hasta'l 20 de xunetu, y ye parte del proyectu de la Tertulia cultural "El Garrapiellu" y del Foru Arte Ciudá pa recuperar el texu de La Collá, en conceyu Siero, un arbol de más de mil años pal que la tertulia pide la declaración como monumentu natural xunta la recuperación de la ruina de la ilesia de San Pedro, templu del sieglu X que se destruyó cuando la guerra civil.

La ruina de l'antigua ilesia de San Pedro de La Collá apaez per primer vegada nel testamentu del rei Ordoñu II, del añu 921. La Tertulia Cultural El Garrapiellu, xunta los vecinos, solicitaron-yos yá nel añu 1993 a los responsables de la Conseyería de Cultura d'Asturies la igua de la ilesia, y una categoría de protección pal texu, pero l'estrozu siguió énte'l silenciu oficial, perdiéndose nestos años la pila bautismal de la ilesia.

Por ello, yá l'otru añu los colectivos de defensa d'esti allugamientu históricu fixeron una celebración simbólica consistente na llectura d'una santa misa n'asturianu nes ruines de la ilesia y un homenaxe al árbol. Los actos van repetise mañana en La Collá, onde un sacerdote perteneciente al Colectivu "Manuel Fernández de Castro" otru de los grupos comprometíos nesta xera, va lleer a les 12 la misa n'asturianu, faciéndose darréu una actividá musical cola participación de la gran intérprete de tonada Mariluz Cristobal Caunedo y el gaiteru Pedro Pangua ente otros.