El galipote nun dañó'l mar

4.500 tonelaes de galipote del Prestige son les que se recoyeron hasta agora n'Asturies dende avientu de 2002, según datos oficiales qu'apurrió ayeri'l Principáu. El datu coincide cola llegada ayeri al Puertu d'El Musel de los barcos científicos Thalassa y Vizconde de Eza, que tuvieron estes selmanes faciendo dellos estudios oceanográficos

Francisco Sánchez, xefe de la campaña, dio nesti sentíu una bona anuncia al afirmar que nun hai mayormente restos de galipote na costa asturiana ente la raya con Galicia y el Cabu Peñes, y dixo que los únicos restos de galipote que s'alcontraron posaos en fondu del mar taben ente Malpica y Muixía, pero con una densidá mui baxa de 300 kilos por kilómetru cuadráu. Pa facese una idea de la concentración de galipote esistente, ello significa qu'hai al tenor de dos manchuques de pocos centímetros nun campu de fútbol. D'otra manera,les sustancies más contaminantes del fuel evaporaríense y marcharíen les más d'elles colos vertíos en superficie y lo qu'hai en fondu ye una sustancia asemeyada a la brea

El problema del galipote nun ta tanto no que queda como no que se pudiere meter na cadena alimentaria. Sobre esti asuntu los científicos adelantaron delles claves al esplicar que nos pexes que s'analizaron nun s'alcontraron restos de fuel, anque ello ye normal porque lo metabolicen. Otra cosa ye como pudiere afectar la inxestión del galipote na capacidá reproductiva de les especies y nel tamañu de los exemplares nuevos. Pa saber a ciencia cierto esi efectu sobre la capacidá reproductiva, los científicos pidieron un plazu de dos o trés años más.

D'otra manera, los estudios sobre les especies de pesca de los dos barcos científicos apurrieron un datu que vien a da-yos una migaya d'esperanza a los pescadores asturianos, y ye que la población de sardina presenta unos índices curiosos. La otra selmana, la flota asturiana de cercu aconceyó con autoridaes del Principáu pa espone-yos los aprietos pelos que ta pasando'l sector tres d'una campaña con resultaos mui malos que yá namás pue salvar la temporada del bocarte