El galipote daña la fauna na costa occidental

L'apaición ayeri d'un calamar xigante muertu pa la parte d'Antromero vovió a poner d'actualidá la presencia y consecuencies de la marea prieto na costa asturiana. Según Luis Laria, director del Cepesma que foi a identificar l'animal, ta rexistrándose de va delles selmanes p'acá una mortalidá bien alta d'especies de mar, lo mesmo cefalópodos que meduses o pexes, casu de los cóngaros. Laria dixo que ta por estudiase, pero que lo mesmo nel casu de calamar que en tolos demás, el culpable de les muertes bien pue ser el galipote del Prestige, que sigue afectando a la costa asturiana.

Xunta esto, ayeri l'asociación Coordinadora Ecoloxista d'Asturies denunció que la retirada del galipote de les playes y pedreros ta faciéndose ensin cumplir unos mínimos de seguranza. La organización dio parte a la Demarcación de Costes del Ministeriu de Mediu Ambiente y al Principáu de delles faltes que vien notando na retirada del galipote. Ente elles rescampla la falta de contenedores apropiaos pa ello, que fai que les bolses de galipote se posen n'arena o que marchen cola basura normal nos camiones de recoyida diario. Otramiente, pa la Coordinadora el mayor esfuerzu na retirada ta llevándose a les playes que tienen más ganchu pal turismu y non pa les que tienen entornos naturales más delicaos, mientres que nun ta prohibiéndose l'andar a mariscu nos llugares contaminaos, llegando a comprobar mienmbros de la coordinadora como se sacaben oricios de playes con galipote del Lydia.