El galés, llingua oficial

El galés yá ye llingua oficial en Galés. El parlamentu autonómicu del país británicu aprobó’l pasáu 7 d’avientu la cooficialidá de la so llingua autóctona xunto cola del inglés.

Anque yá había un usu ampliu del galés per parte de les alministraciones locales, dende’l pasáu 7 d’avientu tolos falantes d’esta llingua celta tienen garantizaos los sos derechos.

El gobiernu de coalición de llaboristes y nacionalistes fixo realidá esta llei que, ente otres coses, va crear un comisionáu pa la llingua galesa col oxetivu de garantizar los derechos de los falantes y desarrolla un sistema p’asegurar qu’organismos públicos y dalgunos privaos ufierten servicios en galés.

El tribunal de la llingua galesa ye otra de les nueves instituciones que recueye esta llei. Al traviés d’él, los falantes van poder recurrir temes rellacionaos cola provisión de servicios nel idioma.

Día históricu pal galés
“Un día históricu pal idioma galés”, asina definió Alún Jones Ffred, del partíu nacionalista galés, la declaración d’oficialidá d’esta llingua minoritaria. Sicasí, otros sectores criticaron la llei pola falta d’ambición de la medida aprobada. Pa estos últimos la llei tendría que dar servicios llingüísticos “en cuenta d’esperar a que los falantes protesten cada vez que quiera usar la so llingua".