El G8 aconceya esti fin de selmana n'Evian

El G-8 l'esclusivu club qu'axunta a los
8 países más ricos del mundu, aconceya esti fin de selmana a la
oriella del llagu Leman n'Evián, na llende ente Suiza y Francia. La
ciudá del famosu agua mineral va ser l'escenariu onde los gobernantes
del Xapón, EUA, Alemaña, Francia, Canadá, Reinu Xuníu, Italia y Rusia decidan precisamente sobre'l futuru de la
xestión de los suministros d'agua, un bien cada vegada más escosu y con un gran valor nel mercáu. L'axenda oficial fala de llevar el suministru d'agua a toles poblaciones que nun tienen accesu al agua potable, pero la contraaxenda de los grupos antiglobalización fala de que lo que se quier ye privatizar esti recursu y dexalu en manes d'un garapiellu de multinacionales encabezaes pola francesa Vivendi.

Sicasí, ello nun va ser namás qu'una parte d'una
axenda con munchos más temes, ente los que, anque nun sal tampoco na axenda oficial, va acabar saliendo'l futuru d'Iraq
tres de la guerra, asuntu a cuentu del que los socios del G-8 lleguen por
primer vez a un cume d'estes característiques xebraos en dos bloques.


En cuantes a la presencia de grupos antiglobalización, el montaxe de seguranza d'esti cume, qu'inclúi un área acutada de 40 kmts alredor de la ciudá, va ensin dulda a menguar el volume de manifestantes, mientres que los medios de película d'espíes que gasta la policía francesa van facer del d'Evian el cume más aseláu dendel famosu de Seattle, cuando'l movimientu antiglobalización tomo cuerpu énte les cámares de la tv. Sicasí, l'antiglobalización, amás d'ocupar hasta onde la dexen, tamién tien tomada la rede: G8 illegal oAnti G-8 son dos de les webs alternatives que van informar del desarrollu del cume gubernamental.

Les polítiques macroeconómiques de lliberalización de mercaos y sobre seguranza y terrorismu
van acabar d'enllenar l'axenda d'un intensu fin de selmana sobre'l que pues descargar un informe
críticu
nesti
enllace del Observatoriu de Delda Esterna de Cataluña, nel que se traten tolos asuntos de que van falar los mandatarios nestos tres díes.