El futuru de la basura d'Asturies, a debate n'Uviéu

La Coordinadora Ecoloxista d'Asturies define los alcuentros "Amantes de la Basura" como un debate ente aquellos que denuncien el modelu de "usar y tirar" como orixe del problema de los residuos y un foru dende'l que "desixir respuestes polítiques, empresariales y sociales al problema de los residuos". Los "Amantes de la Basura" planteguen la necesidá d'un "avance urxente na aplicación de midíes de prevención de los residuos y una mayor axilidá, tresparencia informativa y participación ciudadana nel desarrollu de modelos a escala municipal y rexonal".

Estos alcuentros lleven faciéndose dende va 18 años n'estremaos llugares, como Barcelona o Bilbo, onde se ficieron los dos años últimos, y va ser la primer ocasión que se celebren n'Asturies, concretamente n'Uviéu, onde van desarrollase les xornaes a lo llargo del 9 y el 10 d'ochobre nos salones del Auditoriu Príncipe Felipe.

Fruti Pontigo, de la Coordinadora Ecoloxista, esplicó a Asturies.com que'l noyu del debate va ser el de la xestión de los residuos sólidos urbanos. En palabres del conocíu conservacionista asturianu, n'Asturies hai agora mesmo un debate, un tantu soterráu y poco conocíu en público, pero ciertu, sobre la conveniencia o non d'aplicar a mediu plazu polítiques basaes na incineración de residuos, polo qu'estos alcuentros vienen nun momentu mui afechiscu pa que toles partes interesaes conozan otres esperiencies y ver qu'alternatives esisten a la incineración, una solución que'l movimientu ecoloxista lleva refugando dende va años.

Por ello, el programa de los alcuentros, anque tamién van tratar otros temes, va traer a espertos nel tema en representación de toles partes implicaes, dende responsables de l'ente de residuos asturianu COGERSA hasta representantes d'empreses como ROS-ROCA, que tan desarrollando alternatives de compostao pa la recuperación de los residuos, pasando por integrantes de proyectos yá en funcionamientu de zxestión de residuos urbanos, casu de Luis María Rodríguez, que va presentar la esperiencia de recoyida selectiva y compostao en Montejurra-Nafarroa o l'alternativa del modelu "Residu Minim" que se desarrolla en Cataluña y que va a dar a conocer Joan Salabert.

Xunta les ponencies sobre xestión de residuos tamién van tratase otros aspectos rellacionaos, casu de la fiscalidá aplicable sobre'l reciclao de basura o les alternatives de xeneración d'emplegu a partir del tratamientu de los residuos.

Pa poder apuntase a los alcuentros, qu'incluyen una visita a les instalaciones de Cogersa, la coordinadora dexa los teléfonos 985 57 75 87 - 629 89 26 24