El fueu y la música, protagonistes na nueche de San Xuan

El San Xuan de Xixón ye de siempre ún de los más importantes, pero p'anguaño'l conceyu de la Villa de Xovellanos tien preparao dalgo especial enforma. Un espectáculu de fueos artificiales va complementar la foguera na que va facese presentación en
directo del últimu trabayu discográficu de
Dixebra,
Ensin Novedá.. Xunta los de Xune Elipe en Xixón van tar tamién La Col.la Propinde, el grupu
l.lenizu que ta preparando'l so segundu discu que tendría que tar na cai
pa últimos d'esti añu.



Nel centru d'Asturies hai delles opciones pa esti San Xuan. La primera, la de Llugones, onde l'Asociación
Sociocultural Beltain de Llugones, col sofitu del Conceyu de Siero, entama una
nueche qu'arranca ya de tarde cola actuación de bandes de gaites dende
les 18:00 hores, la entrega de los premios del premiu "Cuentos N'asturianu
sobre San Xuan" y una muestra de tonada con Jorge Tuya y Luis Estrada a
eso de les 21:30 hores. A les 22:30 hores van echar andar los conciertos
cola actuación de la bandina La Galbana a les 22:30 hores. A les
00:15, y dempués de prender la foguera de la fiesta, va tocar
la eterana banda escocesa Shooglenifty, liderada pol
célebre vigulinista
Angus Grant, pesllando la nueche un clásicu del branu asturianu: Los Berrones.

Uviéu pela so parte vuelve a centrar los actos na plaza la
catedral. Dende les 20:30 van desfilar pel centru la ciudá agrupaciones
folclóriques. A les 22:30 va tocar na plaza la catedral el gaiteru
avilesín Rubén Alba, ganador del Memorial Remis Ovalle y que va ser el primer clasificáu pa representar a Asturies el mes d'agostu
nel concursu Macallan dientro del
Festival Intercélticu de Lorient, onde van acompañalu Iñaki Sánchez Santianes, Marco Antonio Guardado y Jorge Suárez. Darréu d'entregar los premios
del "Concursu d'Enramáu de Fontes", sobre les 23:00 hores,
Teatro Margen va facer un espectáculu de teatru de cai que va finar
cuando prenda la foguera a les doce la nueche. Al poco de prender, sobre les
00:15, va ser el folk de Tejedor el que
pieslle esta nueche.

Una de les cites clásiques d'esta nueche ye de siempre la de Corvera. La
que foi una de les nueches folk más importantes d'Asturies, axuntando a
decenes de miles de persones, careció l'añu pasáu'l
despreciu del Conceyu de Corvera, quedando reducida a un programa muncho más modestu que n'ediciones pasaes.
Anguaño meyoróse'l cartel, y pa esta nueche de tán programes les actuaciones
de cuatro grupos folk asturianos. A partir de les 23:00 la música va
arrancar colos veteranos Lliberdón, y tres de la
foguera van xubir al escenariu, Llangres,
La Tarrancha y Batulax.