El fueu respeta Asturies

Asturies rexistró nos primeros 10 díes d'agostu sesenta incendios, con una media de 1,9 hectaries quemaes en caún d'ellos, según
informó la directora xeneral de Seguridá Fina Alvarez na Feria de Muestres de Xixón. La directora avisó de que siempre suel haber más incendios del 15 d'agostu en p'alantre, y reconoción que, anque la fola de calor bien daba pa que se disparare'l fueu, el númberu d'hectaries que quemaron ye enforma menor que'l del añu 2.002


Dende xunu hasta lo que llevamos d'agostu prendieron un total de 188 incendios n'Asturies, que quemaron un total de 358 hectaries, una cifra discreta, lo mesmo que la del primer semestre, que ye de 3.400 hectaries quemaes. D'aguantar esta tendencia, acabaríemos l'añu bien perbaxo del desastrosu añu 2.002, en que quemaron 18.000 hectaries, 13.000 d'elles nos 3 primeros meses del añu, lo que foi un récord absolutu. Precisamente unes 13.000 hectaries foi lo que quemó nel añu 2.001, mientres que los meyores datos hai que dir a buscalos nel 2.000, cuando'l fueu namás abrasó unes 2.000 hectaries.