El fueu nun tien conseyu

El Conseyu del Fueu, órganu consultivu que se presentó va un añu como una importante referencia p'atayar la quema del monte asturianu, namás aconceyó nuna ocasión en tola so historia. Esta ye la denuncia de la Coordinadora Ecoloxista d´Asturies, que pide que se faiga con vistes a la campaña de veranu un conceyu de Conseyu del Fueu, órganu que preside'l Conseyeru de Xusticia y Alministraciones Públiques Javier Valledor y que sienta na mesma mesa a distintes autoridaes, instituciones como la Federación Asturiana de Conceyos y representantes del sector madereru.

Los ecoloxistes reconocen que nestos años llucha contra'l fueu rexistró avances importantes na estaya d'estinción, cola meyora de les dotaciones y la mayor rapidez d'estes en llegar a los fueos, pero ven que la prevención del fueu nun se cuidó un res, cosa grave nun país onde les más de les quemes son obra de persones

La Coordinadora Ecoloxista llamenta que va tiempu que punxo a disposición del Conseyu Asesor un documentu sobre prevención de fueu qu'hasta agora nunca nun volvió a tratase nin estudiase dende la so presentación. El documentu incluyía dellos puntos conflictivos nesti asuntu, entamando por un procedimientu p'apautar les causes del fueu. Esta propuesta contemplaba la creación de cuatro brigaes d'investigación iguaes por Guardes y Bomberos encargaes d'investigar l'autoría física de cada quema, l'usu posterior de los llugares que quemaron y los intereses económicos o problemátiques sociales que pudieren esistir tres del fueu.

D'otra manera, los ecoloxistes solicitaben tamién la ellaboración de planes d'ordenación de los montes teniendo la prevención de incendios como base d'estos planes. Un aspectu enforma interesante dientro d'esta propuesta sedría afalar la repoblación con especies autóctones en cuenta de les resinoses, que prenden más fácil. La prohibición del usu de los llugares quemaos yera otra de les peticiones, xunta con delles aportaciones en materia de formación y medios del personal d'estinción.