El fríu y la ñeve mataron 168 animales en Redes

La Dirección Xeneral de Recursos Naturales y Protección Ambiental dio anuncia ayeri de los datos de mortandá animal en Parque de Redes tres de les nevaes que cayeron nos meses últimos. El parte,que fala namás de les especies que tan catalogaes como "d'interés cinexéticu" lleva a más de 160 los animales muertos por culpa del fríu y de la ñeve, siendo'l venáu la especie más afectada con diferencia, con 140 exemplares muertos nos primeros meses del añu (120 femes y venti machos). El parte de baxes complétase con 20 corzos, 5 robecos y 3 xabalinos, atribuyéndose toles muertes a les nevaes y a causes naturales.

La Viceconseyera de Mediu Ambiente, Ordenación del Territoriu y Urbanismu, Belén Fernández dixo que "la incidencia nun se considera preocupante de nenguna manera" sorrayando que nel casu del venáu "la estimación d'exemplares en Parque Natural de Redes pasa de los 2.500 exemplares y que ye normal incluso que la guardería de montes faiga controles sobre esta especie amás de les caceríes autorizaes. Según s'anunció, la Conseyería de Mediu Ambiente tien tomaes midíes preventives na Disposición Xeneral de Vedes pa la temporada 2005-2006, apautando que dientro de les Reserves de Caza, puedan incluyise nel plan de caza cambeos pa la caza selectiva, control de población y cupos de captura, del venáu, gamu, robecu, xabalín y corzu según les necesidaes de xestión y la repercusión de les condiciones meteorolóxiques sobre les sos poblaciones.

D'otra manera dende la Conseyería recordóse qu'esiste la prohibición espresa de cazar en casu de que'l monte tea tomáu de ñeve, lo que llevó a suspender 15 caceríes de xabalín que taben autorizaes y otres 26 de venáu. La conseyera nun fizo mención a los posibles efectos del furtivismu sobre estes especies nes selmanes que duró la ñeve, anque estos periodos son los más daos a l'acción de cazadores illegales qu'aprovechen la poca movilidá de los animales y la situación estrema pela que pasen pa echase enriba d'ellos con más facilidá. La siguiente temporada de caza mayor na modalidá de batida va entamar el 1 de setiembre de 2005.