El frenu de la baxada de contaxos crea esmolecimientu

El martes detectáronse 150 casos nuevos, con una tasa de positividá diaria del 5,16 por cientu, y hebo 5 finaos con COVID-19. Segunda selmana ensin biltos en residencies.

A falta de la espublización de los datos oficiales de la COVID-19, la Conseyería de Salú comunicó 150 positivos ayeri –l'actualización incorpora ún más hasta los 151–. Son 25 menos qu'ayeri pero una cifra entovía alta qu'amuesa un frenu nel descensu de contaxos.

"Esmolecimientu máximu colos datos de güei. Podemos tar énte l'entamu d'un biltu y una espansión nueva del númberu de contaxos. Tenemos que tar sollertes, yá que los datos son mui preocupantes", espresó ayeri'l presidente Adrián Barbón. Depués d'un mes de baxada, dende'l 2 de febreru, aumentaba per primer vegada la incidencia acumulada a 14 díes, pasando de 198 casos cada 100.000 habitantes a 202 –ayeri tornó a baxar a 200–, a lo que se suma tamién una medra de la tasa de positividá a 7 díes nes xornaes últimes hasta'l 5,88 por cientu –descendió a 5,85 por cientu cola actualización última tomando como referencia'l martes–, perriba del 5 por cientu que marca la Organización Mundial de Salú (OMS) pa tener controlada la pandemia.

La diaria d'ayeri foi del 5,16 por cientu, pola realización de 4.301 pruebes de diagnósticu d'infeición activa, ameyorando la del llunes, cuando quedó nun 6,74 por cientu (3.845 tests fechos). Los díes previos foron del 5,97 por cientu, el domingu; 6,06 por cientu, el sábadu; y 6,87 por cientu, el vienres.

Parón tamién nel descensu de la ocupación hospitalaria

No que respeuta a les hospitalizaciones, hai tamién un parón nel descensu d'ocupación. Permanecen ingresaos en planta 278 pacientes con confirmación o sospecha de COVID-19, 1 menos que'l día anterior, y 108 na UCI, esto ye, una baxada de 2.

Mentes, hai que llamentar la muerte de 5 persones ayeri: trés homes de 93, 85 y 67 años y dos muyeres de 86 y 83, de los que nengún residía nun centru sociosanitariu pa mayores. Dende qu'entamó l'andanciu rexistrénse 1.782 finaos cola enfermedá causada pol coronavirus SARS-CoV-2.

Ensin brotos en centros de mayores

Salú nun detectó nes residencias de persones mayores biltos de coronavirus, lo qu'implica más de trés casos, per segunda selmana siguida. En concreto, del 23 de febreru al 1 de marzu rexistráronse 8 positivos n'otros tantos centros sociosanitarios de los 270 qu'esisten n'Asturies, asina como 10 finaos con domiciliu nellos.

Corvera sal de riesgu estremu

Yá son namái dos los conceyos que siguen en riesgu estremu: Ḷḷena y Piloña. Salú confirmó ayeri la salida de Corvera de la llista, polo que mañana va recuperar la movilidá y abandonar les restricciones del nivel d'alerta 4+.

Pa consultar la situación de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, gráficu del Observatoriu de Salú n'Asturies actualizáu colos datos del llunes.