El #FormientuEnCasaFest supera les 15.000 reproducciones y amplía la so programación de cultura asturiana

Formientu amplía hasta’l 13 d’abril, un día depués de la prórroga confirmada del estáu d’alarma pola COVID-19, el #FormientuEnCasaFest depués del ésitu de la iniciativa. Numberoses persones siguen en direuto tolos díes a les 19 hores les actividaes d’esta iniciativa que supera les 15.000 reproducciones.

“Tamos mui contentos”, apunta Inaciu Galán, mentes que Diego Solís añade qu’estes cifres amuesen que “la cultura asturiana interesa y que ye necesario siguir nesti camín”. Los dos son los coordinadores d’esta iniciativa en llinia na que participaron hasta la fecha Alfredo González, Sergio Buelga, Silvia Quesada, Raquel F. Menéndez, Xaime Martínez o Víctor Suárez, ente otros.

Arantza Margolles va dar mañana continuidá al #FormientuEnCasaFest cola charra ‘En busca de los raigaños: xenealoxía dende casa’, mentes que’l miércoles la escitoria Laura Marcos va poner el taller ‘La ferramienta d'escritura. Técniques pa entamar y meyorar’. L’oxetivu d’esti certame virtual de la revista moza de lliteratura Formientu va siguir siendo’l mesmu, “ufrir a la xente actividaes lliteraries y culturales que valgan pa face-yos pasar el tiempu d’esti enzarru nes cases y poner en valir la importancia de la cultura asturiana y la llingua asturiana nun momentu como ésti”.

Ésti ye’l programa ampliáu del #FormientuEnCasaFest:

• Martes 31: Arantza Margolles, charra 'En busca de los raigaños: xenealoxía dende casa'.
• Miércoles 1: Laura Marcos, tallerín 'La ferramienta d'escritura. Técniques pa entamar y meyorar'.
• Xueves 2: Marisa Valle Roso, conciertín.
• Vienres 3: Luis Núñez, conciertín-presentación del discu 'Blinca'.
• Sábadu 4: Maxi Areñes, conciertín-recital.
• Domingu 5: Alfredo Garay, presentación-recital del poemariu 'Run'.
• Llunes 6: Raúl Alonso, recital poéticu.
• Martes 7: María Abril, charra 'Un rellatu y otres coses'.
• Miércoles 8: Nacho Wings, desión musical 'Discos pa una cuarentena'.
• Xueves 9: Laura Iglesia, charra 'El teatru n’asturianu, la mio esperiencia personal'.
• Vienres 10: Susana Sela, recital poéticu 'Inversu baxo l’agua'.
• Sábadu 11: Natalia González Menéndez, charra 'Edición asturiana: recomendaciones d’una llibrera'.
• Domingu 12: Javier Cayado, charra-recital 'Collage pa confinar feliz'.
• Llunes 13: Nicolás Bardio, presentación del llibru 'Fecho en cuarentena'.