El folk axúntase nun festival solidariu

El trés de xunu a les 20:00 hores nel Auditoriu Príncipe
Felipe d'Uviéu va celebrase un festival col nome de "Malawi
Suéname". Nél, una riestra de grupos folk van tocar de forma
desinteresada col oxetivu d'atropar perres pa un proyectu educativu musical nel país africanu. La entrada
pal festival ye de 5 euros y existe una fila cero nuna cuenta bancaria.



Na ciudá de Chezi, en Malawi, existe una misión qu'agospia a
neños enfermos, güérfanos o que comoquiera tán
marxinaos de la sociedá. Col envís de meyorar la calidá de
vida d'estos neños naz esti proyectu pa la creación d'una escuela
de música qu'aporte daqué a la vida educativa cultural
de los neños del llugar. La iniciativa partió d'Eva Riega Braga, una cooperante
asturiana que vivió na localidá a lo llargo d'un añu y que
caltién el contactu con una misionera asturiana que vive en Malawi,
misionera que s'alcuentra estos díes n'Asturies y que se va encargar de
presentar el conciertu del próximu día 3 de xunu.



Pa enllenar l'auditoriu "Malawi Suéname" axuntó a un
bon númberu de grupos de folk que van dexar el so pequeñu
granín de sable pa echar p'alantre esta iniciativa. Asina ellí van
tar el grupu de pandereteres Dulcamara, el tríu
Tuenda,
DRD y La Bandina. La entrada pal
conciertu, que va entamar a les 20:00 hores y va finar sobre les 22:00
hores, val namás que 5 euros, anque pa toos aquellos que nun puean dir
o quieran sofitar con perres va haber una fila cero faciendo un
ingresu na cuenta bancaria 2038-1095-71-6000438204 (Cajamadrid), especificando
nel conceptu del ingresu "Malawi suename".