El FMI encamienta a España rebaxar la indemnización por despidu

|

El Fondu Monetariu Internacional (FMI) considera la reforma del mercáu llaboral y del sector servicios como les árees prioritaries d'actuación n'España. Pa ello plantea reducir la indemnización por despidu nos contratos indefiníos.

Ente otres coses, tamién defiende eliminar la negociación colectiva centralizada y la vinculación ente salarios y inflación.
  
Nun informe ellaboráu pola institución dirixida por Dominique Strauss-Kahn destináu al analís de les reformes prioritaries pa estimular el crecimientu de la zona euru, el FMI sorraya la necesidá de qu'España recupere competitividá y meyore les sos esportaciones.
  
En concreto, l'informe considera una prioridá que’l Estáu reforme'l so mercáu llaboral  coles mires de reducir el dualismu existente y estimular les contrataciones iºndefiníes "en llinia coles midíes adoptaes pol Gobiernu'l pasáu mes de xunu". 
  
Asina, el FMI encamienta a España rebaxar la indemnización por despidu de los contratos indefiníos hasta "polo menos la media de la UE", asina como facer que la subida de les indemnizaciones seya gradual nos primeros años del contratu y prevenir l'escesivu usu del despidu improcedente.
  
Coles mesmes, la institución pide la descentralización de la negociación colectiva y "eliminar la indexación automática" ente salarios y inflación.

Reformes nel sector servicios
Per otru llau, el FMI tamién considera prioritaria la reforma del sector servicios pa lo qu'encamienta "una ambiciosa aplicación de la Directiva de Servicios de la UE", especialmente pa rebaxar les barreres d'entrada nel área del comerciu minorista a nivel llocal y rexonal.
  
Coles mesmes, l'informe de la institución apuesta por eliminar les restricciones sobre servicios profesionales, baxando la cualificación esixida y recortando les diferencies na regulación aplicada ente les distintes rexones.
  
Per otru llau, el FMI encamienta relaxar les restricciones nel mercáu del alquiler de vivienda no referente a la obligación de los propietarios de renovar automáticamente los alquileres mientres los cinco primeros años de contratu, asina como respecto al techu de subíes añales na renta llendáu al IPC.
 

Contador Estadistiques