El fiscal entama la investigación pola obra del Meicín

Un mes dempués de que se presentare denuncia pola construcción del agospiu de montañeros na fastera de Pinubina, el fiscal xefe del Tribunal Superior de Xusticia del Principáu d'Asturies Gerardo Herrero Montes ta acabante de comunicá-yos a les organizaciones ecoloxistes que denunciaren la illegalidá de la obra l'apertura de dilixencies d'investigación pola mesma.

Colectivu Montañeru pola Defensa de los Picos d'Europa, Coordinadora Ecoloxista d'Asturies, Asociación Asturiana d'Amigos de la Naturaleza (ANA) y Coordinadora Ornitolóxica d'Asturies (COA) formen la plataforma d'organizaciones opuestes a la costrucción del agospiu del Meicín, una obra polémica enforma que yá sufrió cuatro paralizaciones derivaes d'irregularidaes ambientales y urbanístiques a lo llargo de los trés años últimos, teniendo'l proyectu más de 1.000 alegaciones contraries a la so realización y la refuga de la Comisión d'Urbanismu y Ordenación del Territoriu d'Asturies (CUOTA ) a la penúltima versión que se presentó del mesmu, ello mientres que la última variante del proyectu, qu'entamó a construyise a mediaos de setiembre nin siquiera tien el preste o la negativa d'esti organismu en cuantes que, según denuncia la plataforma, la obra del Meicín ta faciéndose ensin nengún de los permisos obligatorios, motivu que llevó a la denuncia de los grupos conservacionistes énte'l Fiscal que se formuló nel mes d'ochobre y qu'agora yá ta en trámite d'apertura de dilixencies.

La construcción d'una pista nueva pa llegar hasta'l refuxu con 2,5 metros d'anchu que nun figura en proyectu y el derribu del refuxu vieyu ensin tener la llicencia obligatoria pa ello son les obres que s'entamaron hasta agora, dambes al paecer de la plataforma ensin tener nengún de los permisos obligatorios nin pasar los trámites imprescindibles como la declaración d'impactu ambiental del proyectu, que s'asitia nuna zona de monte virxe hasta agora de gran importancia mediuambiental pa delles especies, ente elles l'osu y onde se cuenta con asitiar un agospiu pa montañeros que poles sos dimensiones y capacidá nun concasa, al paecer de les organizaciones ecoloxistes, cola obligación de caltener la zona. Los conservacionistes proponen como alternativa que la instalación del agospiu se faiga nel pueblu de Tuiza Riba, a pocos kilómetros de distancia.