El filólogu David Heap fala esta tarde n'Uviéu

El profesor canadiense David Heap, que recuperó un importante trabayu pa conocer la realidá llingüística peninsular que se tenía por perdíu, va ser esta tarde la presencia más importante nes Xornaes d'estudiu de l'Academia de la Llingua

Nos años trenta, primero de la guerra civil, el filólogu Ramón Menéndez Pidal entamó la obra del Atles Llingüísticu de la Península Ibérica, una gran obra que diba lleva-yos, a elli y a los sos collaboradores, a facer un trabayu de campu que nunca nun se ficiere primero y que diba afitar un rexistru completu de los rasgos idiomáticos de cada territoriu de la península

El proyectu yá lu discurriere Pidal a l'altura de 1.914, pero nun foi hasta 1931 que'l Centro de Estudios Históricos decidió patrocinar la obra, entamando'l llabor tres equipos d'encuestadores, que, col mesmu cuestionariu, repartiéronse la península col oxetu de pañar datos de toles zones de llingua romance lo mesmo n'España qu'en Portugal, Andorra y comarca del Rosellón, dexando aparte namás que los territorios de fala vasca. Al tratase d'una obra de proporción peninsular, el procesu de toma de datos nun podía ser eshaustivu, pero tolos conocedores del proyectu concueyen n'emponderar lo mesmo la representatividá de los llugares que s'escoyeron pa les 500 encuestes como lo rigoroso y completo del cuestionariu.

Pal añu de 1.936 los tres equipos yá tan cásique acabando'l trabayu, pero la Guerra Civil obligó a los filólogos a dexar el llabor cuando yá teníen fecho cerca del 90%. Tomás Navarro Tomás, socesor de Menéndez Pidal y director del proyectu nesi momentu, viose obligáu a dir pal exiliu, llevando con elli tolos cuestionarios que se llevaben fechos. Asina l'atles quedó pa prau hasta 1.947, añu en qu'echó a andar otra vuelta l'equipu d'encuestadores, que remataron el proyectu nel 1.954. La cosa paez que va recibir l'emburrión definitivu en 1951, cuando los materiales que guardare Navarro nel exiliu americanu volvieren pa la península gracies a un alcuerdu col Centru Superior d'Investigaciones Científiques, pero l'enfotu acaba otra vegada en decepción.

Anque llegó a espublizase un primer volume de fonética nel añu 1.962 (Atlas Lingüístico de la Península Ibérica, Madrid: C.S.I.C. 1962, tomo I, Fonética) tres d'esta primer entrega, el proyectu del Atles quedó pa prau, nun se sabe mui bien como nin por qué, y pa más aquello, el cuerpu de cartafueyos coles encuestes orixinales espardíose en milenta cachos que quedaron en manes de particulares, biblioteques y archivos de toa triba.

La paralización dende'l CSIC y la fragmentación del estoyu d'encuestes paecía que diben ser la fin d'un proyectu que nun alcontrare namás que torgues a lo llargo de más de trenta años, pero cuando yá naide s'alcordaba d'ello, el sieglu XXI y les nueves tecnoloxíes vinieron a rescatar l'Atles de Pidal del escaezu. Ello foi posible gracies al trabayu de David Heap, profesor na facultá de Filoloxía de la Universidá d'Ontario-Oeste, nel Canadá. Va trés años, Heap abrió una páxina web onde foi asoleyando tolos cuestionarios orixinales del Atles pa usu d'investigadores. Cada cuestionariu consta de 30 páxines que nel web tan escaneaes del orixinal, como les escribió l'encuestador cola so lletra.

La conferencia de David Heap "Las encuestas del ALPI en Asturias" nes Xornaes d'Estudiu de l'Alla va ser güei martes a les 16:30h na Facultá de Filoloxía d'Uviéu.