El FIG y Folkomillas hermánense col espectáculu 'Pueyes'

La Banda Gaites Villaviciosa-El Gaiteru y el grupu cántabru de folk Naheba preséntenlo esti sábadu nel festival con sede en Comillas que s'allarga de vienres a domingu.

'Pueyes' ye la estensión de la idea ellaborada pol Folkomillas Festival y el Festival Internacional de la Gaita (FIG) d'hermanase pa compartir actividaes en común. Asina, aprovechando que tanto la banda maliaya y Naheba tán d'aniversariu, decidieron xunise pa festexalo de manera conxunta sobre'l mesmu escenariu y acompañáu d'amigos, como Jose Manuel Tejedor (gaita asturiana), Rigu Suárez (gaita asturiana), Dani Álvarez (flauta de madera), Nel Sánchez (acordión diatónica), David López (clarinete), Carlos Velasco (saxu y voz), Fani Moro (voz y pandereta), Moi Suárez (guitarra llétrica), Senén Fernández (baxu llétricu), Orestes Barbachán (percusión llatina), Edu Llosa (batería) y Almudena López (voz).

Mañana, de nueche, va desendolcase esti espectáculu que toma'l nome de la parroquia de Pueyes, n'homenaxe a Gervasio Poladura, padre del direutor de la banda Martín Poladura, que finó recién y yera orixinariu d'ehí. Nél va interpretase un repertoriu variáu ente obres d'ún de los compositores, Dani Álvarez, y temes tradicionales d'Asturies y Cantabria. 'Pueyes' va repetise'l 3 de setiembre nel FIG.

Trés díes de música

El XII Folkomillas Festival va comenzar esta tarde, a les 20.30 hores, cola apertura del Mercáu Medieval y l'izáu del 'lauburu', actu que va dar pasu a trés xornaes de música y otres munches actividaes. Na primera van actuar los asturianos Cuchu, amás de los cántabros Clann y los valencianos Quamlibet.

Yá mañana, ente otros, van actuar los llocales Landeral y los aragoneses Ixera, siendo l'eventu principal l'espectáculu 'Pueyes'. Otra formación asturiana, la Bandina Los Gascones, va tocar el domingu, dia nel que tamién van participar los castellanos Duo Vadis y los cántabros Los Castos.