El festival N’Alcordanza, en memoria d’Ígor y Carlos, repite formatu

La música asturiana va tornar a recordar a los ‘felpeyos’ Ígor Medio y Carlos Redondo per octavu añu. El festival N’Alcordanza va tener llugar los díes 27 y 28 de xunu con 17 actuaciones de dellos estilos en nueve llocales de Xixón.

 

Al igual que na edición anterior, cuando s’espublizó un manifiestu que recordaba que l’accidente que sufrieron los dos artistes la Nueche de San Xuan del 2006 de camín a Catalunya foi un accidente llaboral, esti certame entamáu por músicos collacios d’Ígor y Carlos busca tamién reivindicar l’oficiu de músicu, polo que se punxo en marcha una iniciativa que ta teniendo repercusión peles redes sociales. Ésta lleva’l nome de ‘Les postales’ y consiste na ellaboración por parte de venti creadores asturianos de postales nes que representen lo que ye pa ellos la música y la xera y el trabayu de facela. Asina, N’Alcordanza yá espublizó les obres de Fernando Gutiérrez, Marco Recuero, Paco Nadie, Marcos León, Chechu Álava, Luisa Colado, Ángel Heredia, Javier Rodríguez, Blanca Prendes, Alberto Sánchez Peinador, Eudardo Guerra, Gloria Caamaño y Ruma Barbero, nomes a los que van sumase otros nos díes próximes a razón d’una postal per día. “Música ya imaxe xúntense n'alcordanza d'Ígor y Carlos, asina como n'acción de protesta por una mayor considerancia y respetu que merez la música y les persones que la faen”, apunten dende la organización del festival.

 

N’Alcordanza 2014 va principiar el vienres 27 cola actuación de Buensuceso nel Toma 3 (20 hores), pa depués pasar l’espectáculu al Acapulco (22 hores) con un conciertu nel que va tomar parte Medication/2, Los Sangrientos, UHP y Kactus Jack. Yá na mañana del sábadu, Ribera va abrir el programa nel Alambique (13 hores), pa depués dar pasu a la tonada na sidrería Canteli (14.30 hores) con Marisa y Fernando Valle Roso, acompañaos a la gaita por Pablo Carrera. La música na llingua del país va continuar en La Vida Alegre (16 hores) con Silvia Quedada y Alfredo González, y Felpeyu, y, darréu, nel Trisquel (18 hores) con Corquiéu y Rebelguinos. El Patio de la Favorita va garrar el relevu musical a les 20 hores cola presencia d'Hnos. Fratelli y La Villana, pa depués centrar l’atención el Sweet 01 (22 hores) con Black Horde y Herr Manos. Un conciertu de Los Paramétricos, Pilgrim Rose y Blues & Decker va zarrar el festival nel Savoy nuevu a partir de la medianueche.