El Festival Interceltique de Lorient tresllada la edición del so cincuentenu aniversariu al añu qu'entra

|
Cartelu L Festival Interceltique de Lorient aplazamientu 2021

Nun va haber Festival Interceltique de Lorient per primer vegada en 50 años. La situación de crisis sanitaria por cuenta la pandemia de COVID-19 obligó al Conseyu d’Alministración del certame a aplazar esta edición, especial por ser la del cincuentenu aniversariu, al 2021.

Dende’l martes yá se conocía la imposibilidá del so entamu tres la declaración del primer ministru francés, Édouard Philipp. Cualquier eventu de más de 5.000 persones nun se podría celebrar hasta’l 1 de setiembre, tampoco les competiciones deportives, lo que precisamente devolvía al FC Lorient, equipu de fúbol llocal, a la Ligue 1.

Esti xueves aconceyaba’l Conseyu d’Alministración, que ratificaba l’aplazamientu del festival, el más importante de cultura celta del mundu, nel qu’Asturies vien participando dende’l 1986, y anunciaba que la edición del cincuentenu aniversariu, dedicáu a Breizh, el país anfitrión, va celebrase del 6 al 15 d’agostu del 2021. La programación, que yá taba pesllada dafechu y diba anunciase’l 16 d’abril, dalgo que finalmente se prorrogó a la espera de les midíes del Gouvernement de la République française, va caltenese na midida de lo posible.

Representación asturiana

La delegación asturiana pa esta edición taba compuesta pol gaiteru Pablo Carrera, la Banda Gaites Llacín, el Grupo Folklórico Trebeyu y les bandes Llan de Cubel, Felpeyu y Cerezal, ente otros. La organización del Interceltique adelantó que va dir anunciando toles actuaciones y conciertos previstos nesta edición pa "soñar" de cara a la del añu qu'entra.

Contador Estadistiques