El Festival del Cómic d'Avilés mete a Asturies nel mundu de Star Wars

Avilés cumple esti mes de setiembre diez años atechando unes xornaes del cómic que tán ente les más conocíes d'España, y qu'entamaron el día 6. A tanto llega la popularidá del festival qu'un de los dibuxantes que tuvieron l'añu pasáu nestes xornaes de cómic, l'inglés Ian Edington, tuvo la ocurrencia de garrar nomes asturianos p'ambientar una de les aventures gráfiques que-y encargaron pa la serie "Star Wars Tales" basada nes aventures de la popular saga de películes de George Lucas.

La historia pue atopase nel númberu 22 de "Star Wars Tales" y l'argumentu de la mesma cuenta como, a la vuelta d'una reunión na ciudá de "Aviles Prime" les fuerces separatistes asalten la nave del director xeneral "Lorca Oviedo" cayendo a la desierta lluna "Asturias" onde tienen de dir a rescatalu un garapiellu de soldaos clon que descubren que, en realidá, Lorca Oviedo ta col bandu de los malos.

D'esta manera Asturies pasa a ser ún de los pocos llugares del mundu real que tienen un paralelu nel universu de la saga más famosa de la historia del cine. La historia recuéyela'l blog d'Iván Argiz y l'apaición d'Avilés y Asturies na galaxa llonxana tien yá rexistru na wikipedia particular de Star Wars.