El Festival de música antigua de Xixón llega a la VIII edición

La selmana de música antigua de Xixón llega a la VIII edición

Del 12 al 24 d'esti mes va celebrase esti festival de músiques del medievu al barrocu y que va centrase anguaño na música española del tiempu del Quixote.

Amás de los tradicionales cursos, talleres y conciertos, la fundación municipal de Cultura de Xixón va abrir el certame a propuestes como la esposición del "Orpheon de Viena" que va presentar nel Antigu Institutu Xovellanos de Xixón la so colección de más de cien instrumentos d'arcu de los sieglos XVII y XVIII. Dos representantes d'esta fundación, José Vázquez y Lucía Krommer, van poner cursinos d'instrumentos antiguos vigulín, viola, violonchelo y viola da gamba.

El programa de la selmana incluye doce conciertos que van repartise pelos escenarios de tolos años, col Centru de Cultura Antiguu Institutu, la Colexata de San Xuan Bautista y el Teatru Xovellanos como epicentros de l'actividá musical, anque como novedá rescampla nel programa'l conciertu que va dar Andrés Cea nel órganu históricu de la ilesia de Santa María la Mayor de Pravia.

En cuantes a los cursos, nellos van participar xente yá avezada nesti certame como l'especialista n'instrumentos de cuerda Paul O'Dette o Michael Noone xunta l'organista español Andrés Cea y l'especialista en vigüela y guitarra antigua Juan Carlos Rivera. Nesti sentíu, otra de les novedaes del certame va ser la celebración d'un cursu de cantu coral.

No tocante a otres especialidaes, la esperta en danza del barrocu María José Ruiz va poner un cursu de danza histórica, mientres que pal estudiu de la viola, ún de los instrumentos clave del periodu va contase col especialista catalán Jaume Bosser, que va poner un taller de costrucción y reparación col especialista n'instrumentos medievales Antonio Franco.
Más información na web del certame