El festival de monólogos quier facer ver el remocique del xéneru

Inaciu Galán y l'actor Toño Caamaño presentaron el festival de nuevu monólogu asturianu que va celebrase'l 3 de marzu na Sala Albéniz de Xixón

"Modernizar un área na que l'asturianu siempre tuvo normalizáu" esi ye l'oxetivu que se marca Inaciu Galán, responsable de l'asociación H.A Xareos, na presentación ayeri del I Certame de Monólogu Modernu Asturianu que va celebrase'l prósimu día 3 de marzu na Sala Albéniz de Xixón. Inaciu recuerda que'l problema que carez el xéneru ye la falta d'actualización y el so arrequexamientu "a una temática rural y una estética "de boina y cayáu que nun resulten mui atrayentes pa la mocedá d'anguaño".

El trunfu nes cadenes de TV y nos mesmos escenarios teatrales de los "nuevos monologuistes" en castellanu, casu del conocíu espaciu de TV "El Club de la Comedia" llevó a Inaciu Galán a plantegase xunto con Benxa Pérez la conveniencia d'entamar una actividá que contribuyere a remocicar el repertoriu y la puesta n'escena del xéneru. El resultáu final d'esti enfotu va vese'l día 3 na Sala Albeniz de Xixón a les nueve de la nueeche, onde Lluis Antón González (con testu de Chechu García), Luis Cellero, Benxa Pérez y Toño Caamaño van xubir al escenariu pa demostrar les posibilidaes d'actualización del repertoriu del xéneru y tamién pa entretener y provocar la risa del públicu, rematando la nueche con una actuación del grupu de folk "Tarañu".

Toño Caamaño, ún de los actores con más esperiencia de los que van participar nel espectáculu, acudió tamién a la rueda de prensa d'ayeri. N'opinión del fundador del grupu de teatru "Nun Tris" ye importante que se faigan iniciatives como esta "Nun momentu en que los teatros se convierten en centros d'estetica" frase cola que fizo referencia al final del teatru Arango de Xixón. L'intérprete emponderó el que se modernice la imaxe d'espectáculos como'l monólogu asturianu en cuantes que "los asturianos necesitamos mercadotecnia p'aprender a vender lo nuestro"