El Festival de la Marañuela de Lluanco torna a protagonizar la Selmana Santa gozoniega

L’Asociación d’Ames de Casa de Lluanco entama esti xueves una edición nueva del Festival de la Marañuela tres el parón obligáu del añu pasáu por problemes p’atender la demanda. Cae del calendariu festivu gozoniegu la Feria d’Abril.
 
La cai Ramón Pérez de Ayala va ser el llugar onde les ames de casa van poner a la venta nestos cuatro díes de Selmana Santa más de 400 quilos de marañueles qu’esti añu tán ellaborando nel fornu de la Escuela Agroalimentaria de Lluanco. L’apertura de los puestinos ta prevista pa mañana al meudía y la novedá d’esti añu ye la participación nel certame de delles entidaes del conceyu.
 
D’esta forma, Lluanco recupera un festival que l’añu pasáu modificó’l formatu tres la decisión de les ames de cases de nun entamalu por nun poder atender la demanda de marañueles al tar ocupáu’l fornu de lleña onde tradicionalmente veníen faciendo esti dulce. La coalición Bloque por Asturies-Unidá Nacionalista Asturiana (UNA) criticó al gobiernu municipal por nun facer nada por solucionar la problemática qu’atopó esta asociación de muyeres y, por contra, potenciar una Feria d’Abril que llevantó muncha polémica nel conceyu. Como alternativa, organizóse a última hora un festival con un formatu diferente cola participación de cuatro confiteros de Lluanco. Esta Selmana Santa, l’eventu dedicáu a la cultura andaluza nun se celebra y el Festival de la Marañuela torna a la normalidá.