El Festival de Cultura Urbano de Samartín gana un día d'actividaes

|
Cartelu III Festival de Cultura Urbano de Samartín

El certame, que programa deporte, xuegos, talleres y música, amplíase al vienres.

Nel so tercer añu, el Festival de Cultura Urbano de Samartín consolídase como un eventu de referencia pa la mocedá de la cuenca'l Nalón. Esta iniciativa autoxestionada de la l'asociación xuvenil Que Nun Apare!, que nació col oxetivu d’enllenar el vacíu que dexó la non celebración de les tradicionales fiestes de La Llaguna, amplía un día la so programación y dispón inclusive d'una zona d'acampada llibre'l sábadu pa la xente que se quiera averar al conceyu a disfutar de dos xornaes d'ociu y cultura que ponen en valor la interculturalidá, el papel de la muyer y la llingua asturiana.

La plazoleta la ilesia de L’Entregu centra toles actividaes previstes pa güei. A les 18.30 hores arranca’l festival col taller 'Bombes de semientes', impartíu por Güerta Escuela La Llera, pa llueu dar protagonismu a la música con un pasucais de la Charanga Elite Brass Band (19 hores), un conciertu del grupu folk Fontoria (21.30 hores) y la sesión 'DJ Dani Antistailo meets 33900 Vinyl Club' (23 hores). Yá mañana, l'actividá treslládase al parque d'El Florán, onde van instalase hinchables de baldre pa la reciella dende les 12 y hasta les 20 hores.

Al meudía tamién va abrir el mercáu d’asociaciones, comida, artesanía y caxigalines varies, y va comenzar l’amuesa de graffiti y los xuegos y deportes tradicionales con 6 Conceyos. La bandina folk de Blimea Cuatrolán va percorrer a les 13 hores les cais de Sotrondio y Blimea enantes de dar pasu a la sesión “vermú-culete” cola actuación de les pandereteres feministes Nun Tamos Toes.

Sound System

Pela tarde arranquen les actividaes más rellacionaes cola cultura urbano más alternativo. La sound system –sistema de soníu de caxes de madera, ambulante y con orixe xamaicanu– del coleutivu asturianu Allanái va facer qu’El Florán baille a ritmu de la música reggae dende les 16 hores. Nesti espaciu amás va facese y emitise en directo’l programa de Radio QK (107.3FM) 'Fat sounds' a les 17 hores y el taller '¿Qué ye’l Live dub mix?', con Rlantz & Ovella Negra, darréu.

Les actividaes de la tarde complétense col taller d’ellaboración de xabones de llana con Trebeyos (16.30 hores) y l'amuesa del club La Güestia Roller Derby al rodiu esti deporte de contautu sobre patinos orixinariu d’Estaos Xuníos y mayoritariamente femenín (17.30 hores). Mentes, los conciertos van comenzar a les 20 hores, cola presencia de'l dúu de versiones Los Juanillous, los conxuntos de rap La Ziega y Doris Escarlata, y el DJ de música folk-electrónica Fruela 757.

Pa finar, va entamase una Espaciu Sound System, coles esbilles de distintos estilos de reggae puestos por Allanái Crew, los vascos Airaldeko Crew y el productor gallegu Ovella Negra, too ello cola collaboración d’otros y otres artistes de la escena asturiana y les cantantes Ziztada Mc, de Bilbao, y Sista Kata, d'Irun. Hai que destacar que, per primer vegada esti festival que ye posible gracies al sofitu popular, al comerciu y la hostelería de Samartín del Rei Aurelio, y a toles asociaciones, persones y artistes que participen, y como compromisu col mediu ambiente, van emplegase vasos reutillizables personalizaos pa reducir la basoria y el gastu en plásticu.

Contador Estadistiques