El Festival de cómic de Xixón presenta’l llabor de Berto Peña

La mitoloxía asturiana vista dende'l puntu de vista de los llapiceros d'Alberto Álvarez Peña ye l'argumentu d'una de les esposiciones del Salón Internacional del Comic de Xixón que va desarrollase del 11 al 15 d'ochobre.

La organización del Festival nun dulda en calificar a Berto Peña como l'autor contemporáneu que meyor supo espeyar gráficamente'l mundu de los mitos y lleendes tradicionales asturianes, un títulu honoríficu que Peña (Xixón 1966) consiguió tres d'un intensu trabayu autodidacta. Dempués d'abandonar los sos estudios na Facultá de Xeografía y Historia de la Universidá d'Uviéu malcontentu col enfoque que se daba na institución académica de les cuestiones que más-y prestaba conocer y investigar, Berto Peña entamó per cuenta propia una campaña intensiva de recoyida de material etnográficu y de la tradición oral per pueblos y conceyos de toa Asturies, complementando la so formación col estudiu de les técniques artístiques na Escuela d'Arte d'Uviéu, lo que lu ayudó a espeyar meyor la realidá que diba conociendo al traviés del testimoniu oral de munchos pueblos asturianos. El Llapiceru o El Gomeru vieron los sos primeros llabores. Llibros illustraos como Mitos d'Asturies, Cuelebres, Xanes y Trasgos, Celtes n'Asturies o Motivos tradicionales na decoración asturiana nos que los sos debuxos yeren l'atractivu principal de la publicación foron el siguiente pasu de la so actividá creativa .

La esposición que ta abierta dende'l 4 al 16 d'ochobre en Centru de Cultura Antiguu Institutu de Xixón supón un recorríu pela obra de Berto Peña a lo llargo d'estos años, incluyendo delles fueyes de les sos histories en blancu y negru y a color.